DILI, STLTIMORLESTE.com – Ministru Justisa (MJ), Sergio Hornai simu ona relatoriu kona-ba deskonfia ho funsionariu balu neebe iha Diresaun Munisipal Konservatoriu Servisu Rejistu Notariadu Munisipiu Dili sai broker.
“Relatoriu hau simu ona, hau halo ona leitura, tanba nee segredu profisional, segredu servisu no segredu justisa hau labele pronunsia lai,” dehan MJ Sergio Hornai ba jornalista sira iha Kaikoli, Dili, Tersa (28/01/2025).
Governante nee hatutan, iha kestaun rua deit, ida kestaun administrativu no kestaun kriminalidade, tanba nee se iha administrasaun nian sei haruka ba iha instituisaun atu hadia, se relasioan ba iha aktu kriminal sira iha orgaun propriu atu haree.
Momentu mosu informasaun iha media, Ministru Justisa (MJ) hatoo kedan ba iha Gavinete Inspetor Auditoria MJ, halo servisu hela no halo rekomendasaun ho nonok atu dirije ba neebe.
Iha fatin ketak, Komisariu KAK, Rui Pereira dehan, husi parte Komisaun Anti Korrupsaun (KAK) nian sei buka tuir.
“Ami mos sei buka tuir, tanba nee sei tau baner KAK nian, atu hotu-hotu servisu ho fuan ho laran, no servisu ba rai ida nee ho osan ida neebe ita nia direitu, no osan neebe ema seluk nia direitu labele ba foti,” dehan nia.
Aleinde nee Akademiku UNTL, Sebastiao Dos Santos afirma, aktu sira hanesan nee labele tolera, kuandu identifika iha duni indisus ruma, tenbe prosesa tuir lei neebe iha, tanba ema hotu iha lei nia okos.
(ter)