BAUCAU, STLTIMORLESTE.com – Deskonfia membru Polisia Tranzitu ida tiru kanek sidadaun Silvano Gomes, idade 30, iha Suku Irabin de Baixo, Postu Administrativu Uatucarbau, Munisipiu Viqueque.
Xefe Suku Irabin de Baixo, José Baptista do Carmo haktuir, deskonfia insidente nee akontese iha loron 15 Agostu 2026 dader, bainhira vitima ho motor KLX liu husi diresaun edifisiu Polisia Eskuadra Uatucarbau nian, iha neebe deskonfia vitima la uza kapasete too hasoru insidente refere, neebe deskonfia tiru husi membru Polisia Tranzitu ida.
“Nia kondisaun ohin ami ho familia haree nee grave oituan. Tiru iha nia kidan kotuk borus tiha iha oin. Ami deskontente ho Polisia halo atendimentu ba komunidade hanesan nee, tanba trazitu labele uza armas, karik komunidade kontra regras tranzitu nian, iha lei atu regula atu multa, laos nia uza fali armas tiru komunidade,” hateten Xefe Suku nee ba STL liu husi telefone, Sabado (15/08/2026).
Nia informa, vitima daudaun iha ona Hospital Munisipiu Viqueque, parte mediku sira halo atendimentu, maibe tuir planu atu tranfere ba Hospital Nasional Guido Valadares (HNGV) Dili ho aviaun, tanba vitima hetan kondisaun kanek grave.
Nia hateten, ba insidente refere parte Autoridade Suku hamutuk ho familia sira hasoru ona Komadante Polisia Eskuadra Postu Uatucarbau nian atu haree asuntu refere.
“Ohin ami hasoru ona sira maibe sira labele esplika, tanba kazu lao tiha ona entaun ohin ami tuur hamutuk atu asegura situasaun labele akontese,” nia haktuir.
Too notisia nee publika, STL seidauk hetan konfirmasaun ho Komadante Komando Polisia Munisipiu Viqueque.
(tom)
