AMBENO, STLTIMORLESTE.com – Deskonfia prizioneiru ida mai husi prizaum Becora tuir julgamentu, lakon husi prizioneiru nain 3 sira nia liman iha Tribunal Primeiru Instansia Distrital Oecusse iha semana Kotuk.
Tuir kronolojia akontese prizioneiru nee halai ho naran inisial CM iha semana kotuk husi Dili ho kareta prizaun, lori detendidu atu tuir julgamentu iha tribunal Primaria Instansia Distrital Oecusse, maibe seidauk too loron julgamentu, derepente lakon husi Guarda Prizioneiru nain 3 nia liman iha Tribunal Oecusse.
Tuir Xefe Suku Taiboco, Mateus Naas katak, detendidu nee ho naran inisial CM, husi Bairru Bione, Aldeia Makelab, Suku Taiboco, Postu Administrativu Pantemamasaar Rejiaun Administrativa Espesial Oecusse-Ambeno (RAEOA).
“Hau konhese detendidu nee husi hau nia Suku Taiboko, Aldeia Makelab, Bairu Bione, hau agradese ba informasaun nee atu aviza ba hau nia komunidade sira,” dehan Xefe Suku Taiboco, Mateus Naas bá STL iha Oecusse, Tersa (26/05/2026).
Relasiona ho detendidu Oecusse oan lakon husi Guarda prizioneiru nain 3 sira mia liman, media STL konfirma ho parte guarda prizaun neebe fo seguransa ba detendidu nee lakohi temi naran katak, sira la iha kompetensia atu relata informasaun bá publiku liu husi media, tanba nee media sira bele konfirma direitamente ho xefe prizaun tanba buat hotu relata ona bá nasional, kona-ba detendidu lakon iha Tribunal Primeiru Instansia Distrital Oecusse.
Ho informasaun detendidu lakon iha Tribunal Oecusse, Komandante Polisia Nasional Timor Leste (PNTL) Rejional Oecusse seidauk bele relata informasaun, tanba Komandante PNTL RAEOA sei halao servisu iha Komando PNTL nian iha Nasional Dili, tanba nee too notisia nee publika, STL seidauk hetan konfirmasaun husi parte seguransa PNTL.
(jos)
