DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida Prizaun Preventiva ba arguidu nain tolu (3) ho inisial WYF, JT no WY.
Arguidu nain tolu lori mai iha Tribunal, no husi parte Ministeriu Publiku (MP) promove sira tuir artigu 183 Kodigu Prosesu Penal Timor Leste.
Juiza Turnu Ana Paula Fonseca halo tiha identifikasaun ba arguidu nain tolu, aleinde rona tiha sira nia deklarasaun, ikus mai husu ba iha MP no defeza arguidu sira nian atu tama ba iha faze alegasaun.
Iha alegasaun Prokurador Turnu Domingos Gouveia Leite solisita ba iha Juiza turnu atu aplika medida Prizaun Preventiva ba iha arguidu nain tolu, tanba konsidera iha indisus ba krime neebe MP promove mai iha Tribunal.
Rona tiha alegasaun husi parte MP no defeza, ikus mai Juiza turnu hatun despaisu ikus, deside aplika medida Prizaun Preventiva ba iha arguidu nain tolu.
Prosesu primeiru interogatoriu nee prezide husi Juiza turnu Ana Paula Fonseca, MP reprezenta husi Prokurador turnu Dmingos Gouvea Leite, arguidu sira hetan asistensia legal husi Advogadu Privadu nain rua, Octavio Cardozo no Pedro Camoes.
Tuir regra neebe iha, despaisu Tribunal nian kuandu arguidu sira la konkorda bele liu husi sira nia defeza halo rekursu ba iha Tribunal Rekursu, tuir prazu loron 30 nia laran.
(ter)
