DILI, STLTIMORLESTE.com – Relasiona ho Ministériu Edukasaun (ME) neebe detekta diploma falsu 31 husi eskola 8, inklui Eskola Sekundariu Jeral nu. 4 Setembru, maibe husi ME seidauk bolu Diretor ESJ 4 nu. Setembru Balide hodi klarifika asuntu nee.
Lia hirak nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba STL iha nia knaar fatin, Sesta nee (05/06/2026).
“Nee mak la hatene, tanba hau seidauk haree, maibe asina iha diploma nee falsu. Ema ruma mak uza naran eskola nee mák la hatene, tanba husi Ministeriu Edukasaun seidauk bolu hau ba haree,” dehan Sergio.
Antes nee Diretor Jeral Ensinu Sekundáriu, Deolindo da Cruz dehan, diploma hirak nee Diresaun Nasional ESJ identifika bainhira sira lori mai legaliza dezde Janeiru 2026 too agora. Diresaun mos bolu kedan nain mai hodi hatete ba sira katak, diploma falsu no labele fo fila fali. Nain ba produs diploma mak Ministériu Edukasaun, nee duni wainhira identifika katak, diploma neebe sidadaun sira kaer detekta falsu Ministeriu sei prende hodi prosesa tuir regras.
“Ohin loron Diresaun Jeral entrega diploma falsu hamutuk 31 ba Inspesaun Ministériu Eduksaun hodi prosesa tuir regra neebe vigor iha ita nia rain,” dehan Deolindo.
Nia dehan, husi diploma falsu hirak nee mai husi ema uza naran eskola nian hanesan Eskola Hati Kudus Yesus nee diploma tempu Indonezia nian hamutuk 3, ESG 28 Novembru eskola neebe agora konvente ona ESTV diploma falsu 4, ESG 12 Novembru diploma falsu 2, ESG 4 Setembru falsu 12, ESG privadu Cristal diploma falsu 4, ESG Katolika Paulo VI diploma falsu 3, ESG 1912 Same diploma falsu 2, ESG no Liquica diploma falsu 1, total hamutuk 31, husi 31 diploma nee kompostu husi mane 21 no feto 10, iha kapital Dili eskola 6, munisipiu eskola 2 mak Manufahi ho Liquica.
“Hau nian diresaun ensinu sekundariu, iha nee marka prezensa ona parte Inspesaun husi ME nian, ho Diretor Ensinu Sekundariu, liu husi oportunidade ida nee hakarak entrega dokumentus sira neebe mak durante nee iha prosesu legalizasaun, ita nian diresaun nasional sekundariu jeral, ho nia ekipa konsege detekta atu entrega ofisialmente ba gabinete Inspesaun jeral hodi halo prosedimentu neebe mak Vigor,” tenik nia.
Nunee mos sub Inspektor Jeral Nucleu Administrasaun Eskolar, Rodolfo Aparicio dehan, ohin ne’e parte ensinu nasionál entrega ona diploma falsu ba Inspetór Jerál hodi kontinua prosesa ba oin.
“Ohin entrega ona mai inspesaun jerál hodi kontinua asegura no prosesa atu ema hotu tenke la’o tuir sistema Ministeriu Edukasaun nian. Nunee diploma sira ne’e ami sei halo verifikasaun ba pesoál katak diploma ne’e se mak fó,” nia dehan.
(jac)
