DILI, STLTIMORLESTE.com – Relasiona ho dezentendimentu neebe antes nee mosu entre Polisia Sientifika Investigasaun Kriminal (PSIK) no Diresaun Servisu Investigasaun Kriminal (DSIK), Ministru Justisa simu ona relatoriu.
“Hau simu ona relatoriu konaba dezentendimentu, hau nia rekomendasaun ba iha Diretor Nasional PSIK no Komandante Jeral mak tenke ordena, halo melhoramentu servisu ida iha uma laran, ida iha Estadu Republika Timor Leste nia mahon,” dehan Ministru Justisa, Sergio Hornai ba jornalista sira iha Kaikoli, Tersa (18/08/2026).
Ministru Justisa hateten, husi rekomendasaun nee husu atu fahe informasaun ba sira hodi servisu ba iha interese komun, interese kombate kriminalidade ba iha krime organizadu no mos krime ordinariu sira.
Governante nee sublina, bele akontese nee dala ruma iha konflitu individu, maibe institusionalmente labele iha konflitu, tanba instituisaun rua nee aparelu Estadu nian, sira nia servisu mak atu konduz politika investigasaun kriminal tantu iha kazu sira ordinariu no mos kazu sira neebe ho nia natureza komplesidade.
Hanesan tipu de krime mais elevada sira iha obrigasaun atu halo koordenasaun, kooperasaun diak entre instituisaun importante rua hanesan polisia kriminal.
Iha sorin seluk, Akademiku UNTL, Rafael de Jesus dehan, tuir lo-loos labele mosu dezentendimentu ba malu, tanba parte rua nee halao servisu importante hotu.
“Hau hanoin parte rua nee halao servisu mesak importante hotu, tuir lo-loos koordena malu atu labele mosu dezentendimentu hanesan nee,” dehan nia.
Afirma, importante mak asegura ema neebe komete krime atu labele halai ses, tanba se mosu dezentendimentu ema balu mos bele aproveita situasaun nee hodi bele halai ses.
Akademiku nee husu atu ba oin tenke iha kooperasaun diak entre PSIK no DSIK hodi labele akontese tan hanesan saida mak akontese ona.
(ter)
