DILI, STLTIMORLESTE.com – Oras nee daudaun Dili Institute Of Technology (DIT) halo hela estudu viabilidade, hodi loke kampus rejional iha Munisípiu Baukau, no sei halo proposta ba Ministériu Ensinu Superior Siensia no Kultura (MESSK).
Lia hirak nee hatoo husi Reitor DIT, Salustiano dos Reis Piedade ba STL iha nia knaar fatin, Tersa nee (14/04/2026).
“Agora daudaun nee ami halo estudu viabilidade ba iha Baukau, estudu nee sei lao hela, bainhira estudu remata ona nee depois mak ami halo analiza, tanba nee ami nian survey nee remata mak ami bele hatene, nee ami loke iha Baukau Kota Baru, iha neeba ami loke uma tolu ona,”.nia dehan.
Nia hatutan, uluk sira atu loke sentru treinamentu iha neeba, maibe la konsege, depois sira koko atu halo ona survey loke departamentu balun iha neeba, tanba nee mak sira paradu tiha nee, tanba nee agora daudaun sira halo fali estudu viabilidade ba ida nee.
“Ami Iha planu sei loke tan kampus rejional Baukau, agora daudaun iha hela faze estudu viabilidade, liu husi estudu née mak ita hetan informasaun hodi loke departmentu saida iha neba. Maibe antes atu loke, bazeia ba rezultadu estudu née mak sei hatoo proposta ba Ministeriu Ensinu Superior Siensia no Kultura para hetan lisensiamentu operasional. Kuandu iha ona lisensiamentu operasional mak foin bele loke,” nia esplika.
Iha fatin seluk, Reitor Instituto Superior Cristal (ISC), Sebastião Pereira dehan, ISC seidauk iha planu loke tan polo iha munisipiu seluk, tanba nee sei mantein polo tolu neebe daudaun nee eziste ona.
“Ami nian polo tolu iha munisipiu tolu nee agora daudaun sei nafatin, nee mak eskola polo husi Munisipiu Baukau, Manufahi no Aileu, ba oin sei la loke ona iha munisipiu seluk, tanba ami sei mantein ho polo tolu neebe mak daudaun nee iha,” nia esplika.
Nia dehan, ninia prosesu ensinu aprendizajen iha eskola polo tolu nee lao diak hanesan baibain, tanba kada dosentes idak-idak halao ninia prosesu aprendizajen ba estudantes lao ho diak, nee duni polo tolu nee halo ninia atividades lao diak.
(jac)
