DILI, STLTIMORLESTE.com Familia boot Dili Institute of Technology (DIT) selebra Dies Natalis ba dala XXIV no gradua estudante finalista hamutuk ema nain 270.
Serimonia Graduasaun Programa Lisensiatura ba dala XXIII ho Mestradu ba dala X ho tema “ Papel Ensinu Superior iha Transformasaun Siensia no Kultura ba Dame, Inovasaun Teknolojia no Rejilensia Ekonomia Nasaun iha nivel Rejional no Global” halao iha Salaun Centro Convencao Dili (CCD) Kaikoli, Segunda (11/5/2026).
Reitor DIT, Dr. Salustiano Dos Reis Piedade, M.Sc liu hosi nia diskursu hatete katak ho laran ksolok konfere grau akademiku ba estudante finalista sira nebee priense ona obrigasaun akademiku tomak no konklui ona sira nia kursu iha DIT.
“Ohin 11 Maiu 2026 sai hanesan momentu importante ho orguilozu ida iha vida akademika, Dili Institute of Technology tanba, DIT selebra Dies Natalis ba dala XXIV. Tan nee ksolok boot ba hau nuudar Reitor no Prezidenti Senadu Akademiku DIT hatoo parabens ba familia boot DIT, liu-liu ba fundador sira nebee harii instituisaun kualidade ho respeitoza nee,” hatete nia.
Nia informa katak total estudante finalista nebee tuir seremonia graduasaun ba dala 23 iha loron 11 Maiu 2026 hamutuk ema 270. Husi total ida nee, School of Engineering and Science (ema nain 86), School of Petroleum Studies (ema nain 5), School of Business and Management (ema nain 108), ho School of Tourism and Hospitality (ema nain 34). Programa Mestradu Master of Business and Management/MBA (ema nain 6).
“Seremonia graduasaun hanesan ultimu eventu akademiku neebe imi partisipa iha imi nia kampus DIT. Tanba nee, ohin loron, ita selebra imi nia sussesu neebe konklui ona imi nia estudu iha DIT. Durante tinan naruk, imi serbisu makaas no luta ba imi nia objetivu. Imi liu ona dezafiu no obstaklu oi-oin, ho presistensia e preseverança, imi konklui estudu ho sussesu. Parabens ba imi, inan-aman ho familia hotu ba ksolok nee,” katak Reitor Salustiano.
Nia hatutan tan katak henesan graduadu husi DIT, graduadu sira iha responsabilidade hodi dezenvolve ninia-an no oferse kontribusaun positivu ba sociedade no nasaun. Mundu agora persisa lider neebe iha abilidade ho hanoin kritiku, kreativu, no iha expertise iha informasaun teknologia. Buka investe makas iha sistema digital, Ingles ho soft skills hodi kompete no manan iha merkadu servisu.
“Hanesan graduadu DIT nian imi tenki utiliza imi nia kuinesementu no abilidade nebe mak imi hetan ona hodi resolve problemas neebe mak ita nia sociedade sira hasoru no kria solusaun ho kreativu no inovativu. Imi mos iha responsabilidade moral hodi luta ba valores lia los, justiça, no dignidade umana, uza imi kuinesementu no abilidade guia mudansa positivu iha ita nia sociedade no nasaun Timor Leste,” tenik nia.
Iha oportunidade ida nee, Reitor Salustiano hatoo apresiasaun nebee aas no obrigadu wain ba:
Governu Timor Leste, liu husi Ministeriu Ensinu Superior, Siensia no Kultura, the University of Western Australia, Victoria University, Australia, Universitas Udayana, Australian Volunteer International (AVI), Volunteers Service Abroad (VSA), New Zealand, Engineers Without Borders, MPRM, INAP, ANP, Timor-Gap EP, Conoco-Phillps, Slumberger, Bank Mandiri, BNCTL, KIESPTL no seluk tan neebe la temi ida-ida nebee sai parseria diak ba DIT.
Nia mos hatoo agradese wain ba inan-aman graduadu sira neebe fo fiar ba DIT hodi eduka sira nia oan sira.
Hatoo mos obrigadu wain ba sivitas akademika DIT hotu ba sira nian vontade diak, komitimentu makas ho servisu la kolen no solidu hodi lori DIT too hetan naran diak iha sosiedade ho industria. Agradese mos ba fundador DIT ho membru BOT-DIT ba tulun hodi trasa ho aprova mehi, lina jeral ba destinasaun DIT nian.
Lori familia boot DIT nia naran hatoo gracias ho profisiat ba graduadu ho nia inan aman-sira. “Espera imi hotu susesu iha imi nia kareira,” katak Reitor Salustiano.
Entretantu, Afonso Guterres neebe reprezentante graduadu sira liu hosi nia diskursu hato’o agradese wain ba estrutura tomak DIT nian no ema hotu nia apoiu moral durante sira halao sira nia estudu to’o remata.
Nia dehan, edukasaun ajuda hamenus komflitu, laos edukasaun aumenta tan problema iha Timor laran. Nia mos dehan nasaun nee forti depende ba rekursu humanu. Tanba nee, akademika sira la bele sai penonton iha nia nasaun rasik.
“Agora daudaun Timor Leste sai ona membru ASEAN. Tanba nee presiza tebes luta iha jerasaun sira neebe kualidade atu kompete iha mundu globalizasaun,” katak nia.
Nunee mos Prezidenti Konselhu Permanente DIT, Dr. Estanislau Saldanha hatete eventu ida nee importante tebes ba DIT, tanba aleinde gradua estudante finalista sira, selebra mos Dies Natalis DIT nian ba dala XXIV.
“Agradese wain no onradu tebes ba DIT. Hau lori familia boot DIT nia naran hato’o parabens, kongratula, susesu ba investimentu neebe inan-aman halo ba oan sira neebe nia razultadu mak ohin ita hotu asisti hela nee,” katak Estanislau.
Serimonia nee remata ho asina Nota de Entendementu entre DIT no Kenneth & Co.
(mik/ger)
