DILI, STLTIMORLESTE.com – Ministeriu Edukasaun (ME) liu husi Diresaun Nasional Ensinu Sekundáriu Jeral (DNESJ) nafatin halo kontrolu ba diploma falsu, bainhira sidadaun neebe legaliza sira nian diploma, parte ME sei identifika didiak diploma nee falsu ou lae.
Informa Diretor Nasional Ensinu Sekundariu Jeral iha ME, Benjamin Gomes da Cruz Fernandes ba STL iha ME, Kuarta nee (15/07/2026).
“Ami kontrola nafatin konaba diploma falsu nian nee ami entrega ona diploma falsu 31 ba Inspesaun Jeral no agora husi Inspesaun Jeral mak halo prosesu ba ida nee, sira mak halo ida nee, ami labele interven, tanba ami nian mak nee, bainhira iha legaliza mak ami hetan, nee ami entrega ba sira, husu ba ita boot sira se bele ba husu iha parte inspesaun nian katak, ninia prosesu nee lao too iha neebe ona,” nia akresenta.
Nia dehan, sira kontrolu nafatin, karik bainhira hetan diploma falsu nee sira sempre prende nomos sira sempre entrega ba parte inspesaun jeral atu buka tuir ema neebe mak falsifika dokumentus, tanba nee bainhira sira hetan diploma falsu nee sira sempre hatoo ba parte relevantes sira.
“Ita nian legaliza diploma ba ensinu sekundariu nee kada loron ita atende nafatin. Hau hanoin kada loron Ministériu Edukasaun (ME) atende ema neebe legaliza diploma too 100, ba hirak neebe urjente bele foti kedas iha loron refere.
“Legaliza diploma nee lao hanesan baibain, kada loron atende ema too 100 tun mai, maibe loron rua tolu mai nee menus, tanba depende vaga, karik instituisaun balun mak loke vaga ruma, nee ita simu ema barak mai legaliza diploma, ema ladun mai legaliza sira nian diploma, entaun nee loron ida ita simu deit 20 nunee. Ba sira neebe mak urjente nee sira foti kedas,” dehan nia.
Nia dehan, simu numeru legaliza barak, nee depende ba iha vaga, balun atu kontinua sira nian estudu, hirak neebe hetan bolsu estudu, no balun urjenti, nee loron ida deit sira bele foti kedas, maibe atu legaliza presiza haree didiak diploma nee para bele kontrolu nafatin diploma neebe falsu.
“Ba ita nian maluk sira neebe mai legaliza diploma tenke hatudu ho diploma orijinal, la urjente nee ohin hatama no aban mak foin foti. Nee sira tenke lori diploma kopia tahan lima, atu nunee legaliza hotu sira nain foti fali sira nian diploma,” nia akresenta.
Iha fatin seluk, Inspetor Geral Nucleu Administrasaun Eskolar, Rodolfo Aparicio hatete, prosesu investigasaun lao hela, sei lori tempu, tanba nee diak liu husu asuntu ida nee ba iha ekipa, tanba nee konfirma ho ekipa sira, koalia ho sira.
“Hau sente prosesu investigasaun ba diploma falsu 31 nee lao hela, sei lori tempu, tanba nee diak liu husu asuntu ida nee ba iha ekipa, tanba nee konfirma ho ekipa sira, koalia ho sira,” nia komenta.
(jac)
