BAUKAU, STLTIMORLESTE.com – Sekretariu Estadu Dezenvolvimentu Lokal liu husi Diresaun Nasional Promosaun Efisiensia Administrasaun Lokal (DNPEAL) avalia kondisaun ezistentes iha Munisipiu Baukau.
Sekretariu Estadu Dezenvolvimentu Lokal, Mateus dos Santos Tallo hateten, avaliasaun kondisaun ezistentes hahu kedas iha tinan 2024 kobre ona Munisipiu sira iha territoriu nasional no too loron 09 Junhu 2025 durante semana iha Munisipiu Baukau no sei kontinua ba Munisipiu Lautem no termina iha Munisipiu Dili.
Avaliasaun kondisaun ezistentes refere ho politika Governu nian atu estabelese desentralizasaun poder lokal, papel importante ida husi Sekretariu Estadu Dezenvolvimentu Lokal ho politika neebe implementa ona liu husi pose ba kargu xefia sira iha nivel Munisipiu hahu husi Prezidente Autoridade too Administrador Postu sira iha Baukau.
Nunee avaliasaun kondisaun ezistentes nuudar pasu avalia servisu Administrasaun Lokal molok ba avalia kondisaun minimas iha tempu badak tuir politika Governu sentral.
“Hau hanoin tempu ona tuir planu sei avalia kondisaun minimas iha tempu badak, servisu sira iha Administrasaun Lokal nian sei avalia fali liga ba servisu sira loro-loron nian. Dirasaun ida nee importante atu sukat fali kondisaun sira tinan tuir mai haree kondisaun minimas,” hateten Mateus liu husi diskursu bainhira abertura avaliasaun kondisaun ezistentes iha Salaun Sentru Konvensoens Baukau, Segunda (09/06/2025).
Nia sublina, objetivu prinsipal husi avalia kondisaun ezistentes mak atu konkretiza servisu Administrasaun Publiku sira liu husi Administrasaun Lokal iha nivel Munisipiu too Postu Administrativu sira. Nunee avaliasaun refere sei too iha nivel Postu Administrativu durante semana ida iha Baukau atu hatene funsionamentu servisu hodi sukat ba planu asaun anual no instalasaun poder lokal.
Aleinde mos liu husi avaliasaun refere atu sukat Administrasaun Publiku liu-liu atendimentu ba komunidade sira iha prosesu dezenvolvimentu anivel Munisipiu, tanba Governu iha komprimisiu boot ba implementasaun poder lokal.
“Ita boot sira hatene Governu esforsu hela dezentralizasaun poder lokal hanesan programa importante ida neebe tenke implementa mandatu Governu ida nee, Munisipiu Baukau prepaktiva haree progresu sira lao ba kondisaun minimas,” Mateus argumentu
argumentu.
Reprezentante Prezidente Autoridade Munisipiu Baukau atual Sekretaria Munisipal Asuntu Sosial, Maria Celestina Viegas hateten, evaluasaun refere nuudar meius atu hadia servisu no halo preparasaun masimu ba servisu sira hodi implementasaun poder lokal.
“Avaliasaun ida nee ita hotu atu hatene halao ita nia knaar sira halao seidauk diak presiza haree nafatin halo preparasaun diak hodi simu servisu ruma husi Nasional too mai hakat ba dezentralizasaun ho kondisaun sira neebe ita priense nafatin,” hateten Maria.
Entretantu avaliasaun kondisaun ezistentes nee realiza iha salaun Sentru Konsensoens Vila Antiga Baukau hetan partisipasaun masimu husi diretores linha ministerial sira no Autoridade Postu Administrativu ualu iha Munisipiu Baukau.
(tom)
