DILI, STLTIMORLESTE.com – Diresaun Nasional Transporte Trestrre (DNTT) sei la hadia semáforu neebe mak daudaun la funisona ka aat, tanba tinan nee DNTT atu instala foun hotu semáforu sira neebe la funsiona iha sidade Dili.
Hatete Xefe Departamentu Seguransa Rodaviária DNTT, João Eujenio da Silva ba jornalista sira iha Kaikoli, Dili, Kuarta (13/05/2026).
Nia tenik, razaun DNTT la tau orsamentu nee tanba laos orsamentu mak laiha atu koloka ba hadia semáforu, maibe tinan nee DNTT atu tau hotu semáforu foun.
“Semáforu barak mak la funsiona, tanba ho razaun tinan nee ita atu tau trafiku foun, tanba ita la tau orsamentu para hadia semáfru sira neebe aat, orsamentu laos la iha, maibé ita mak la tau deit, tanba tinan ne’e ita tau foun fali,” nia esplika.
Nia informa, fatin neebe DNTT atu instala semáforu foun hotu iha area sanulu resin rua neebe mak DNTT identifka ona.
“Iha fatin foun mak nee iha area kuluhun, Elemloi no Aimutin, sira seluk nee mak balu la funsiona no aat nee ita sei troka hotu, hanesan semáforu Balide, Prokuradór Jerál Repúblika nian, Kolmera, Bidadu, Bidau Toko Baru , Licidere, Bemori no Baganza nian nee sei tau foun hotu,” nia deklara.
Eujenio hatutan, semáforu modernu haat neebe instala ona nee mak sei la sobu hodi la troka no sira seluk sei troka hotu.
“Atu dehan semáforu haat ne’ebe mak foin daudaun tau foun ne’e mak la tau foun,” katak nia.
Nia Informa, kona-ba sianais zebra kross fulan nee nia laran sei haree no hadia zebra kross tanba kompanhia manan nain iha ona.
“Kompanhia mak Bandidu Kualidade, pinta zebra kross sira neebe mak iha estrada sira tinta mos ona no sinais nee pinta hotu, maizumensu iha loron 18 fulan Maiu kompanhia hahu ona nia servisu,” nia hakotu.
Antes nee liu husi Plenária iha intervensaun polítika iha Parlamentu Nasionál Deputadu Bankada FRETILIN, Dário Madeira kritika Ministériu Transporte no Komunikasaun, tanba la konsege rezolve problema semáforu neebe kauza ba dezastre aumenta bebeik iha kapitál Díli.
Nia katak, semáforu iha area Kolmera no kruzamentu importante sira iha Díli balu la funsiona ona kuaze tinan ida, maibe Governu seidauk fo resposta efetiva. Karreta no motorizada sira mos trankadu tun sae deit iha kruzamentu sira. Situasaun ida nee afeta povu atu bá servisu no halao atividade loro-loron nian.
“Kareta hadau malu dalan iha kruzamentu sira hanesan nee, zebra kross sira iha Díli laran kuaze la diak hotu ona, maibe Ministru sei toba hela,” nia koalia.
Nia afirma, engarrafamentu agora sai problema regulár iha estrada kruzamentu sira iha Díli, maibe ministeriu nakait sira seidauk hatudu asaun neebe vizível no konkretu atu rezolve. Partikularmente kondisaun zebra kross no sinal tranzitu sira, neebe maioria la klaru ona no menus manutensaun.
Hatan ba preokupasaun nee, Vise-Ministru Asuntu Parlamentár, Adérito Hugo da Costa rekoñese katak, problema neebe deputadu sira levanta importante no pertinente tebes.
Nia deklara, Governu sei hatoo preokupasaun nee ba Ministériu relevante sira, atu bele toma medida no fo atensaun lalais.
“Deputadu sira iha razaun, tanba iha fulan lima ona eziste situasaun ita-nia sinais tránzitu sira, iha ita-nia kapitál Díli, neebe ke estragus ona, tuir loloos iha ona reabilitasaun ka instala fali sinais tránzitu, neebe foun para nunee bele ajuda situasaun tráfegu iha kapital Díli, neebe ke aumenta ba bei-beik, liu-liu iha oras servisu.
(jen)
