DILI, STLTIMORLESTE.com — Dom Jaime Garcia Goulart sai figura importante iha promosaun edukasaun no sai Bispu primeiru Dioseze Dili.
Reitor ISFIT, Padre Justino Tanec, hatete ida-ne’e ba jornalista sira durante vizita Dom Jaime Garcia Goulart ba ISFIT Fatumeta, Kuarta (3/09/2026).
Bispu Timor-Leste nian hili Dom Jaime nu’udar patronu ISFIT tanba nia kontribuisaun boot ba edukasaun no formasaun Igreja.
Padre Justino hatete, Dom Jaime la’ós de’it pastor, maibé mos promotor edukasaun ba padre, katekista no povu Timor.
“Dom Jaime hanoin katak Timor-oan presiza edukasaun atu moris ho dignidade nu’udar Maromak nia oan no sidadaun,” hatete nia.
Tuir Padre Justino, Dom Jaime konsidera formasaun padre Timor-oan nu’udar prioridade atu garante Igreja iha kolaboradór lokál.
Bispu presiza padre sira nu’udar kolaboradór besik liu, tanba padre sira ajuda atende nesesidade komunidade no sarani sira.
Padre Justino hatete, Dioseze Dili mos presiza padre diosezanu, liuliu padre Timor-oan atu kontinua servisu ba Igreja.
Tanba razaun ne’e, Dom Jaime harii Semináriu Soibada hafoin Segunda Guerra Mundial, maski infraestrutura barak rahun tanba konflitu.
“Hafoin funu, buat hotu tenke hahú hosi zero, no Dom Jaime haree edukasaun nu’udar dalan importante atu harii fali Timor,” nia esplika.
Semináriu ne’e prepara Timor-oan atu sai padre no fila fali ba servisu Igreja, komunidade no sosiedade.
Padre Justino hatete, formasaun padre sira sai meiu atu Timor-oan bele kontribui ba futuru Timor ne’ebé di’ak liu.
Iha nivel daruak, Dom Jaime promove edukasaun ba katekista sira, tanba padre sira labele responde nesesidade sarani hotu.
“Padre sira labele halo buat hotu. Leigu presiza formasaun no edukasaun adekuadu atu bele ajuda Igreja,” dehan nia.
Dom Jaime harii eskola ba katekista sira, ne’ebé tuir Padre Justino, ajuda hametin forsa moral, akademika no espiritual komunidade.
Katekista sira kontinua importante iha sosiedade, liuliu bainhira situasaun politika difisil limita servisu padre sira.
Padre Justino hatete, kontribuisaun katekista sira ajuda mantém fiar Katolika no sustenta vida espiritual komunidade.
Razaun daruak Bispu sira hili Dom Jaime nu’udar patronu mak atu promove edukasaun ba leigu sira.
Nivel datoluk mak edukasaun ba Timor-oan vulnerável, ho Igreja promove edukasaun Katolika ne’ebé inkluziva no aberta ba ema hotu.
Igreja liu hosi edukasaun, hakarak ajuda família vulnerável hadia sira nia moris no kontribui ba harii Timor inkluzivu.
ISFIT harii iha 2013 no hili kedas Dom Jaime Garcia Goulart nu’udar patronu ba instituisaun ne’e.
Naran instituisaun, Instituto Superior de Filosofia e de Teologia, liga ho figura Dom Jaime Garcia Goulart no nia legadu edukasaun.
Dom Jaime nia kontribuisaun konsentra iha edukasaun ba padre Timor-oan, katekista, leigu no komunidade vulnerável.
Dom Jaime Garcia Goulart moris iha Candelária do Pico, Açores, Portugal, iha 10 Janeiru 1908.
Nia simu ordenasaun sacerdotal iha 10 Maiu 1931, antes mai Timor atu servisu iha área pastorál no formasaun semináriu.
Iha tinan 1941 to’o 1945, nia sai Administradór Apostóliku Dioseze Dili.
Tuir mai, hosi 1945 to’o 1967, Dom Jaime sai Bispu primeiru Dioseze Dili.
Nia rezigna aan iha 1967 tanba razaun saúde no mate iha Portugal, iha 15 Abríl 1997.
(joa)
