DILI, STLTIMORLESTE.com — Dom Virgílio Cardeal do Carmo da Silva, SDB prezide misa ikus atu fó omenajen ba preladus na’in haat (4) iha Altar Santo Tasi Tolu, Dili, ho mensajen kona-ba dame, fé no esperansa.
Misa ne’e hala’o atu fó omenajen ba preladus bispo na’in tolu no Monsenhor Martinho Lopes. Dom Virgílio prezide misa ne’e, ho akompañamentu husi Bispu Baucau no Bispu Maliana, bispu sira husi rai-li’ur no padre sira husi munisípiu 13, inklui RAEOA.
Iha ninia omilia, Dom Virgílio subliña importânsia orasaun, família, espiritualidade, amor no humanidade, no apela ba fiéis atu hametin esperansa no promove dame ba futuru.
Nia hateten, fé no espiritualidade iha papel importante iha moris ema, liuliu atu hametin solidariedade, karidade no amor ba humanidade.
Dom Virgílio mós haktuir importânsia atu respeita no valoriza istória, tanba esperiénsia husi jerasaun anteriór bele sai ezemplu no orientasaun ba jerasaun foun.
Iha kontestu luta ba liberdade, nia fó énfase ba coragem no kompromisu ema sira ne’ebé servisu ba liberdade no dame. Istória hirak-ne’e, tuir nia, sai parte importante husi memória povu.
Nia mós subliña katak, Igreja iha papel importante iha vida komunidade, liuliu liuhosi fé, solidariedade no servisu ba humanidade.
Dom Virgílio apela ba ema hotu atu kontinua hametin espírito dame, reconciliassaun no unidade, no lori valor hirak-ne’e ba jerasaun futuru.
Nia afirma, esperansa, amor no karidade sei sai baze importante atu harii sosiedade ne’ebé respeita dignidade umana no promove moris iha dame.
(jos)
