DILI, STLTIMORLESTE.com – Prezidente Estadus Unidus Amerika, Donald Trump hatoo felisitasaun ba Timor Leste (TL) nia Aniversariu Restaurasaun Indepedensia ba dala 24 nomos adezaun ba ASEAN.
Timor Leste simu felisitasaun husi Prezidente Donald Trump ba Aniversariu Restaurasaun Independensia ba dala 24 no Adezaun ba ASEAN.
Prezidente Republika Jose Ramos-Horta, simu Karta Felisitasaun husi Prezidente Estadus Unidus Donald J. Trump ba Aniversariu Restaurasaun Independensia 20 Maiu.
Iha karta ho data 06 Maiu 2026, neebe entrega husi Embaixada Estadus Unidus iha Díli, Prezidente Trump felisita Timor-Leste ba aniversariu restaurasaun independensia ba dala 24 no ninia konkista historika ba adezaun plena iha Asosiasaun Nasaun Sudeste Aziatiku (ASEAN).
“Bainhira Timor Leste selebra aniversariu ba nia Restaurasaun Independensia iha 20 Maiu, hau hatoo hau nia parabens ba Ita-boot no povu Timor-Leste. Ami mos hatoo parabens ba Timor-Leste nia adezaun plena iha Asosiasaun Nasaun Sudeste Aziatiku iha tinan kotuk pasu istoriku ida neebe reflete papel kresimentu husi imi nia nasaun iha rejiaun. Hein katak imi-nia selebrasaun nasional sei nakonu ho ksolok,” hateten Prezidente Donald J. Trump iha ninia karta neebe STL asesu husi media PR, Tersa kalan (12/05/2026).
Parseria entre Estadus Unidus no Timor-Leste reflete iha sira-nia dedikasaun mutua hodi promove rejiaun Indo Pasífiku neebe livre no nakloke.
Prezidente Trump valoriza progresu neebe nasaun rua alkansa ona liuhusi kooperasaun sira iha defeza, seguransa, asuntu ekonomia, no liu tan.
Iha biban nee Prezidente Republika Jose Ramos-Horta hatoo agradesimentu ho laran-kmanek ba Prezidente Donald Trump no ba povu Amerikanu, hodi enkuadra karta nee hanesan omenajen ida ba espíritu reziliensia Timor-oan nian.
“Hodi povu Timor-Leste neebe luta no hafolin ami-nia independensia, hau agradese ba Prezidente Donald J. Trump ba nia karta felisitasaun ho laran-kmanek. Ninia rekoñesimentu ba ita-nia adezaun ba ASEAN laos deit rekoñesimentu ida ba ita-nia governu nia esforsu, maibe ba sidadaun Timor-oan ida-idak neebe fiar katak ita-nia nasaun bele okupa nia fatin neebe loos iha família nasaun sira. Estadus Unidus hamutuk ho ita durante luta no pas, no mensajen ida nee reafirma amizade neebe dura,” afirma Prezidente J. Ramos-Horta.
Ba povu Timor-Leste, rekonesimentu ida-nee mai iha momentu profundu orgullu nasional. Hafoin harii hikas nasaun husi ahi-kudesan konflitu nian, Timor-Leste agora hamriik nuudar membru soberanu no respeitadu iha komunidade internasional, ho adezaun ba ASEAN neebe reprezenta aspirasaun durante dekada barak neebe finalmente konkretiza.
(eme)
