DILI, STLTIMORLESTE.com – Oras ne’e, dosentes husi Instituto Ciência Saúde (ICS) hamutuk nain 6 kontinua sira-nia estudu iha Portugal no Brazil, hodi hasai grau mestradu.
Kestaun ne’e hato’o husi Reitór ICS, Leão Borges, ba STL iha nia knaar fatin, Kuarta (02/09/2026).
“Tinan ne’e ami haruka dosente nain ida deit atu kontinua estudu iha nasaun Brazil, hodi hasai mestradu iha área farmásia. Bolsa estudu ne’e FDCH mak selu. Maibé, agora daudaun, dosentes ami-nian ne’ebé kontinua estudu iha Brazil no Portugal hamutuk nain 6, no sira hotu ba hasai mestradu,” dehan nia.
Nia dehan, dosentes nain 6 ne’ebé agora daudaun estudu iha Portugal no Brazil, sira ba hasai mestradu iha área enfermagem no nutrisaun.
Tuir Leão Borges, dosentes ho grau lisensiatura ne’ebé iha agora sei nafatin iha ICS, maibé sira hanorin estudante sira ne’ebé hasai diploma nível 3, no la hanorin estudante sira ne’ebé hasai grau lisensiatura.
“Ami-nia dosentes ho grau S1 sei barak loos. Ninia númeru hau ladún hatene, maibé sira mos hanorin estudante sira ne’ebé hasai diploma 3,” nia haktuir.
Iha fatin seluk, Reitór DIT, Salustiano dos Reis Piedade, hatete katak dosentes husi DIT hamutuk nain 17 kontinua sira-nia estudu iha rai liur.
Tuir nia, dosentes nain 17 ne’e, nain 3 estuda iha Portugal, nain 4 iha Brazil, no nain 10 iha Indonézia. Sira kontinua estudu iha área petrolíferu, negósia, língua Português no Inglês.
“Agora daudaun dosentes DIT ne’ebé estuda iha rai liur hamutuk nain 17. Husi nain 17 ne’e, nain 3 estuda iha Portugal, nain 4 iha Brazil, no nain 10 iha Indonézia. Sira kontinua estudu iha área petrolíferu, negósia, nomós língua Português no Inglês,” nia esplika.
Nia dehan, preokupasaun ida husi MESSK mak atu dezenvolve liután kapasidade língua Português. Tanba ne’e, dosentes balun haruka atu kontinua estudu iha área língua Português, enkuantu sira ne’ebé ba Indonézia estuda liu-liu iha área língua Inglês.
“Hau hanoin husi ami-nia dosentes nain 17 ne’e, nain 6 hetan bolsa estudu husi FDCH, no nain 11 ami mak haruka. Nain 6 ba hasai mestradu no nain 11 ba hasai doutoramentu. Normalmente, mestradu dura tinan 2, no doutoramentu masimu tinan 5,” dehan nia.
Iha parte seluk, Direitór Jerál Ensino Superior no Siénsia, Domingos Barros, hatete katak universidade ne’ebé iha dosentes ho nível akademiku lisensiatura deit, so bele hanorin estudante sira iha nível diploma 1 to’o diploma 3.
Tuir Domingos Barros, se universidade ida ho dosentes ho grau lisensiatura nafatin hanorin estudante sira iha nível lisensiatura, prátika ne’e kontra lei, no Ministériu sei la fó lisensa operasionál ba kursu hirak ne’e.
“Universidade ne’ebé ho dosentes nível akademiku lisensiatura so bele hanorin deit ba nível diploma 1 to’o 3. Maibé, se sira nafatin hanorin nível lisensiatura, ne’e kontra lei, no Ministériu sei la fó lisensa operasionál ba sira-nia kursu. Karik sira kontinua hanorin, aban-bainrua estudante sira-nia diploma sei la hetan legalizasaun husi Ministériu,” nia dehan.
(jac)
