BAUCAU, STLTIMORLESTE.com – Tarefas transporte públiku diresaun Baguia–Baucau Vila sa’e to’o US$ 10 ba kada pasajeiru ne’ebé lori sasan barak, enkuantu pasajeiru ne’ebé la lori sasan selu US$ 6.
Xefe Suku Hae-Coni, Luis Oliveira, hateten katak kondisaun estrada husi Suku Afaloicai, Ossohuna no Hae-Coni ba Baguia Vila, ne’ebé antes difikulta movimentasaun transporte públiku no privadu, atual normaliza ona, iha ne’ebé fasilita ona movimentasaun transporte nian no reduz ona folin nesesidade baziku, hanesan foos, atualmente kada saka 25 kilogramu folin entre US$ 13 no US$ 13.50.
Maibé difikuldade ba komunidade agrikultór sira mak tarefas pasajeiru ne’ebé aplika husi balun transporte públiku, tanba antes ne’e komunidade husi Suku Hae-Coni ne’ebé viajem ba Baucau Vila selu US$ 5 ba kada ema, atual tarefas ba pasajeiru sa’e ba US$ 6.
“Antes komunidade pasajeiru sira husi ami nia Suku Hae-Coni mai Baucau Vila, ema ida selu US$ 5.00. Agora sa’e ba US$ 6.00. Maibé ita nia komunidade sira fa’an produtu lokal, ba saka ida tenke selu US$1.00 tan hamutuk ho ema nia tarefas sai US$ 7.00. Se lori saka 10, ema ida tenke selu US$ 10.00,” nia hateten.
Luis Oliveira subliña katak la’ós transporte públiku hotu-hotu husi Hae-Coni mak aplika tarefas ne’e, maibé iha balun de’it.
Maibé komunidade la hatene baze ka razaun ne’ebé kondutór sira uza hasae tarefas, tanba iha situasaun balun pasajeiru tenke selu presu ne’ebé kondutór determina, se lae, kondutór lakohi tula.
“Ita la hatene tarefas pasajeiru ne’e sira foti husi ne’ebé. Derepente hanesan ne’e de’it. Se la selu, nia lakohi tula. Entaun oinsá mak ita bele to’o iha Baucau? Se hakarak ka lakohi, tenke selu,” nia afirma.
Tuir Xefe Suku Hae-Coni, aumentu tarefas ne’e fó impaktu liu ba komunidade agrikultór sira, tanba sira depende transporte públiku atu lori produtu lokal husi suku ba merkadu.
“Tarefas ne’e fó impaktu ba komunidade agrikultór sira. Ita atu keixa mos la di’ak, tanba bainhira keixa tiha, sira bele la halai tan. Entaun oinsá mak komunidade sira bele asesu merkadu?” nia husu.
Nia hateten katak, kondisaun nee to’o agora, Diresaun Munisípal Transporte no Komunikasaun (DMTK) Baucau seidauk halo intervensaun kona-ba aumentu tarefas ne’e.
“Too ohin loron DMTK Baucau seidauk halo intervensaun. Tanba ne’e ami husu se bele karik hatun tarefas ne’e tuir nesesidade no possibilidade komunidade nian,” dehan Luis Oliveira.
Iha sorin seluk, Diretor DMTK Baucau, Mariano Pinto da Costa, hateten katak seidauk iha orientasaun foun husi DMTK atu hasae tarefas ba transporte públiku diresaun Baguia–Baucau Vila.
“Ita nafatin mantein tarefas anterior husi Baguia mai Baucau Vila, kada ema selu US$5.00. Seidauk iha orientasaun foun katak atu hasae tarefas ba direksaun Baguia–Baucau Vila,” Mariano hateten.
Nia hateten DMTK, nu’udar entidade ne’ebé iha responsabilidade ba transporte iha Munisípiu Baucau, kontinua fó orientasaun ba operadór transporte públiku sira atu la hasae tarefas sem autorizasaun.
Tanba nee husu ba pasajeiru sira atu hato’o keixa ba DMTK bainhira hetan kobransa tarefas liu presu ofisiál ne’ebé estabesele ona.
“Se karik kondutór sira mak hasae tarefas, bainhira hetan keixa husi pasajeiru, ita sei fó sansaun ba sira. Tanba ne’e husu pasajeiru sira tenke hato’o keixa bainhira selu US$ 6.00,” nia hateten.
(tom)
