DILI, STLTIMORLESTE.com – Dadaun nee dosentes lisensiatura (S1)husi Instituto Ciência Saúde (ICS) nain 6 kontinua sira nian estudu ba maestradu iha nasaun Portugal no Brazil.
Lia hirak nee hatoo husi Reitor Instituto Ciência Saúde (ICS), Leao Borges ba STL iha nia knaar fatin, Kinta nee (16/04/2026).
“Ami nian dosentes permanenti nee lima nolu resin, ho sira bolu dehan parte tempu nee hamutuk atus ida resin, ami nian dosentes lisensiatura nee sei iha, lisensiatura nee hanorin diploma 3, agora daudaun sira barak mak ba foti ona maestradu, balun tinan nee hotu ona, balun sei kontinua,” nia esplika.
Reitor ICS nee hatutan, bolsu estudu husi FDCH, tinan kotuk 2025 nee iha nain 6 mak pasa teste no daudaun nee sira kontinua estudu ba maestradu iha nasaun Portugal no Brazil, nain 2 iha Portugal, nain 4 iha Brazil, maestradu nee husi FDCH fo ba sira tinan rua ho balun, nee duni tinan 2028 mak sira remata estudu.
“Ami nian dosentes lisensiatura nain 6 neebe agora daudaun ba kontinua estudu maestradu ninia nee iha area infarmajen, nutrisaun ho farmacia, tinan nee ami nian dosentes nain 4 mak hatama ona dokumentus iha MESSK para bele tuir teste, nain haat nee husi lisensiatura ba maestradu, sei tuir teste, liu ou lae, nee ita seidauk hatene,” nia informa.
Iha fatin seluk, Reitor Dili Institute Of Technology (DIT), Salustiano dos Reis Piedade dehan, DIT nafatin hadia rekursu dosentes hodi haruka dosentes ba kontinua estudu iha programa maestradu no doutoramentu.
“Iha DIT primeiru ami hadia nafatin rekursu dosentes sira, ida nee ita tenke halo, tanba ami haruka ami nian dosentes sira, para bele ba kontinua nafatin sira nian estudu sira nian programa maestradu no doutoramentu, agora dadaun nee kuaze dosentes DIT nee hotu-hotu maestradu, entaun ami tinan-tinan nee tuir DIT nian kbiit ami haruka nafatin kontinua sira nian programa doutoramentu,” nia esplika.
Nunee mos Reitor East Timor Coffee Institute ( ETCI), Mateus Maia de Jesus, East Timor Coffee Institute (ETCI) nafatin hasae kualidade dosentes no daudaun nee dosentes 11 kontinua estudu iha rai liur.
“Ami nian kapasitasaun dosentes ba tinan ida nee laiha, maibe tanba iha tinan kotuk ami haruka tiha ona, tanba antes nee ami haruka ona dosentes ba kontinua estudu iha rai liur hamutuk 11, nee ba iha nasaun Indonezia ho Brazil, nee ba maestradu ho doutoramentu, dosentes 11 nee ba iha area agrikultura hotu,” dehan nia.
(jac)
