DILI, STLTIMORLESTE.com – Tuir Komunikadu Impresa neebe STL asesu husi Media Ministeriu Interior katak, Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) no Diresaun Servisu Informasaun Polísia (DSIP), junta Forsa Polisia hamutuk ho Servisu Migrasaun halao operasaun konjunta, hodi desmantela tan atividade rede Scam Call Centre iha apartamentu ida neebe lokaliza iha Suku Fatuhada, Postu Administrativu Dom Aleixo, Munisípiu Dili.
Iha operasaun nee, ekipa konjunta konsege identifika sidadaun Xineza nain 6 inklui feto ida husi vietnamita, neebe deskonfia envolve iha atividade Scam Call Centre refere.
Ekipa konjunta kontinua halo apreensaun ba sasan sira neebe uza atu apoia atividade nee, inklui telemovel hamutuk 30, ekipamentu Starlink hamutuk 2 no iPad 3. Sidadaun sira nee lori kedas ba edifisiu DSIK iha kuartel Jerál PNTL Caicoli, hodi halao prosesu investigasaun hafoin entrega ba Ministeriu Publiku hodi kontinua halo prosedimentu no dispozisaun lei neebe vigora iha Timor Leste.
Tuir Akademista UNTL, Julio da Costa katak, atividade rede Scam Call Centre nee fulan haat ona PNTL desmantela sidadaun Xineza no indonezia barak, maibe rezultadu investigasaun konaba se mak autor lo-loos ba atividade Scam Call Centre seidauk hatene.
“Ita labele kontente ho PNTL nia servisu diak no desmantela tan sidadaun sira neebe halao atividade Scam Call Centre, maibe PNTL la buka no investigasaun klean ba Scam Call Centre nee se mak outor prinsipal, sei hetan ona autor nee ita bele dehan atividade nee menus ou bele Kombate,” hatete Akademista UNTL, Julio da Costa ba STL iha kampus UNTL, Tersa (04/08/2026).
Nia afirma, Diresaun Servisu Investigasaun Kriminal (DSIK) no Diresaun Servisu Informasaun Polísia (DSIP), junta Forsa Polisia (FP) hamutuk ho Servisu Migrasaun (SM) diak tebes, maibe seidauk kompleta metas neebe iha, sei buka hatene ona se mak autor ba atividade nee kaptura ona, atividade nee mos Kombate ona no haruka fila sidadaun neebe kria atividade Scam Call Center, tanba nee perigozu ba pais ida nee.
(jen)
