BAUKAU, STLTIMORLESTE.com – Delegasaun Territorial Florestal, Kafe Plantas no Industria (DTFKPI) Baukau, evakua ona kareta patrolhu Korpo Gurda Florestal (CGF – sigla português) neebe para hela iha uma komunidade area Suku Triloka, Postu Administrativu Baukau Vila.
Xefe Departamentu Delegasaun Territorial Florestal, Kafe Plantas no Industria Munisipiu Baukau, António José Lopes esplika, kareta patrolhu CGF neebe durante para iha uma komunidade area Triloka viral iha media sosial publiku la komprende konteudu notisia “Kareta Patrolhu CGF Abandona iha Triloka” tanba la lee notisia refere, maibe kritika tuir gostu hodi atake servisu.
Maibe kareta para iha area Triloka hahu iha loron 02 Junhu nee, iha parte kalan bainhira ekipa remata monta kuadru avizu iha area Kairavela Vemasi neebe fila husi Kairavela too iha area Suku Bukoli kondisaun kareta parte roda oin karuk komesa tarutu, maibe kundutor obriga konduz too uma komunidade iha area Suku Triloka hafoin avaria no labele kontinua viajen, nunee para hela iha komunidade nia uma oin.
“Kareta nee ami para iha Triloka dia 02 kalan, dia 03 dader ami ba fali sobu nia rolamentus mak rahun, entaun ami ba sosa rolamentus tau, maibe sosa kedas iha Dili sasan ami monta hotu kareta mos ami lori mai ona,” hateten António José Lopes ba STL iha Vila Nova Baukau, Kinta (05/06/2025).
Nia sublina, hafoin kareta avaria iha rolamentus parte oin karuk, hanesan dirijenti CGF Baukau desloka kedas husi Baukau ba Dili iha loron 03 Junhu sosa rolamentus foun no loron 04 Junhu nee normaliza kondisaun avaria no daudaun kareta refere iha ona edifisiu CGF Baukau.
Nia fundamenta, normalmente hanesan sasan tenke avaria, tanba uza ba servisu patrolhu loron no kalan inklui apoiu servisu seluk, maibe hanesan dirijenti prontu responsabiliza mezmu para iha uma komunidade, maibe komunidade tau matan.
“Entaun hau hakarak fo hatene ba publiku katak, se la hakbesik kareta haree nia kondisaun lalika komen, lee kompleta mak bele fo komentariu,” nia hakotu.
(tom)
