DILI, STLTIMORLESTE.com – Komando Polisia Nasionál Timor Leste (PNTL) liu husi Diresaun Tranzitu Seguransa Rodaviariu Nasional (DTSRN) ho Emprezariu Heineken iha Timor Leste (TL) halo estensaun asina MoU kona-ba atividade sosializasaun eduka Timoroan hemu tua ho responsabilidade.
Hatete Diretór Diresaun Tranzitu Seguransa Rodaviariu (DTSRN), Superintendente Asistente Luís da Costa ba jornalista sira iha Komando Jeral PNTL Dili, Tersa nee (10/06/2025).
Nia esplika, akordu servisu hamutuk nee nia durasaun ba tinan 2, nunee ba oin Autoridade Seguransa Tranzitu ho Emprezariu Heineken sei servisu hamutuk halo sosializasaun ba estudante no kondutor sira kona-ba hemu tua ho resposabilidade hodi salva vida.
Nia esplika, kooperasaun entre PNTL liu husi Diresaun Tranzitu Seguransa Rodaviariu ho Empreza Heineken hodi halao servisu hamutuk durasaun kada tinan 2 termina ona.
“Entaun ohin Empreza Heineken ho Poltranz estende tan akordu kooperasaun ba tinan rua husi 2025 ate 2027. Durante nee ita nia empreza Heineken kooperasaun diak,” nia deklara.
Nia mos konsidera katak, durante nee empreza refere apoiu tebes PNTL liu husi Diresaun Tranzitu nian hodi halao atividade, oinsa bele informa ba sidadaun sira atu hemu tua ho responsabilidade.
“Ho akordu ida nee, ami bele servisu hamutuk informa ba sidadaun sira atu bele hemu ho responsabilidade, tanba ita nia sidadaun sira dala barak hemu hodi kondus transporte halai la kontrola aan no hetan asidente barak liu,” katak nia.
Luis koalia, Heineken hanesan empreza neebe boot ba serveza nian, tanba nee mak PNTL servisu hamutuk ho Empreza Heineken nia promosaun ba sira nia produtu nee ba sidadaun sira hotu atu bele hemu ho responsabilidade.
“Durante nee ita servisu hamutuk diak los apoiu saida deit mak ita husu sira sempre apoiu ita, tanba nee mak Empreza HEINEKEN sempre apoiu ita ho masimu, ha’u espera katak ba oin sira sei apoiu makaas liu ba PNTL liu-liu iha Diresaun Tranzitu Seguransa Rodaviariu nian,” nia informa.
Durante nee Diresaun Tranzitu Seguransa Rodaviariu nomos Empreza Heineken servisu hamutuk halo sosializasaun ba komunidade nomos ba estudante sira atu bele hemu tua karik hemu ho responsabilidade no kondus trasporte ho diak.
“Durante ami servisu hamutuk halo sosializasaun ba Estadu sira liu Universidade sira neebe iha kapitál dili nomos iha tempu badak ami halo sosializasaun ba Motorista Mikrolet sira tanba Motorista dala ruma lori trasporte publiku maibe ho kondisaun lanu tanba nee PolTranz ho Heineken atu esplika ba sira oinsa hemu ho responsabilidade,” nia haktuir.
Tanba dala barak asidente neebe akontese iha fatin-fatin nee fator humanu mak barak liu, tanba fator dominante asidente barak iha via publiku nee fator humanu.
Iha fatin hanesan, Diretór Empreza Heineken iha Timor Leste, Komang Satria Wibawa agradese ba PNTL tanba Heineken ho Diresaun Tranzitu Seguransa Rodaviariu asina MoU ba kooperasaun durante tinan 2 tanba Heineken nia kooperasaun ho PNTL liu-liu Diresaun Tranzitu Seguransa Rodaviariu tinan naruk ona.
“Hau kontente tebes ohin ami bele estende tan ami nia kooperasaun durante tinan 2 nian, tanba PNTL nia responsabilidade boot tebes, oinsa atu asegura nia komunidade sira hodi hemu tua ho responsabilidade tanba durante ami nia servisu hamutuk oinsa ami bele halo sosializasaun ba komunidade liu-liu motorista sira atu bele hemu ho responsabilidade hodi kondus transporte ho diak,” nia koalia.
Diretór nee reforsa katak, empreza Heineken ho PolTranz sempre servisu hamutuk hodi halo sosializasaun ba estudante sira oinsa bele kuidadu sira nia aan husi asidente sira, tanba Heineken Timor Leste hanesan Empreza ida hakarak kontribui ba rai ida nee ho responsabilidade boot.
“Ami sempre servisu hamutuk ho Autoridade seguransa PNTL liu-liu Diresaun Tranzitu Seguransa Rodaviariu nian halo sosializasaun tanba ami nia responsabilidade boot ba Timor Leste ida nee no ami prontu apoiu kualker atividade husi PNTL nian ba futuru,” nia afirma.
(jen)
