DILI, STLTIMORLESTE.com – Ensinu Baziku Filial (EBF) Marinir hahu konstrui dapur provizoriu atu tein programa merenda eskolar ba estudante sira.
Koordenador Ensinu Baziku Filial (EBF) Marinir, Aureliano Maia dehan ba jornalista STL iha nia knaar fatin, Kinta nee (13/08/2026).
“Ami nian ensinu aprendizajen lao ona, nunee mos programa merenda eskolar nee lao dezde iha loron 3 Agostu bainhira estudantes sira tama eskola, prograna nee mos lao kedas. Konaba menu ba programa nee lao tuir duni menu iha manual neebe iha,” nia informa.
Nia hatutan katak, merenda eskolar nee lao nafatin, maske dapur seidauk iha, fornesedor sira tein uza provizoriu dapur tuan nee, neebe mak husi EBF Marinir mak tula mai, maibe agora daudaun foin halo konstrusaun dapur ba merenda eskolar, konstrusaun nee provizoriumente, tanba nee menu nee fornesedor sira lao tuir mata dalan neebe mak iha ona.
“Hau hanoin menu nee balun ami uza produtu lokal no balun produsaun mai husi rai liur, estudantes hamutuk 891 mak asesu ba iha programa merenda eskolar iha ami nian eskola, nee duni menu ba merenda nee ami nian fornesedor sira halao tuir deit ba iha mata dalan neebe iha ona,” nia dehan.
Iha fatin seluk, Superintendente Edukasaun Munisípiu Dili, Cesarina C. Guterres hatete, eskola balun iha Munisípiu Dili hahu halo konstrusaun dapur ba tein programa merenda eskolar ba estudantes sira.
“Hanesan eskola EBF Camea Centru, maske dapur foun iha ona, maibe sira nafatin uza ai sunu no sira tein iha liur no hahan tasak mak foin lori ba dapur foun. Tuir ami nia observasaun hanesan nee, maibe kontrusaun mai husi ME ou Estatal, tanba informasaun atu klaru liu tan, diak liu husu iha Diretor SEM Dili,” dehan nia.
(jac)
