BAUCAU, STLTIMORLESTE.com — Prosesu aprovizionamentu nasionál ba konstrusaun edifísiu edukasaun infánsia unidade lima (5) iha Munisípiu Baucau remata ona, no sei hein unidade rua (2) seluk atu kontinua ba faze konstrusaun.
Diretór Servisu Munisípal Edukasaun Baucau, Afonso dos Santos da Costa, hateten katak projetu konstrusaun edifísiu edukasaun infánsia ne’e lansa iha inísiu tinan 2026, iha Suku Bucoli, Postu Administrativu Baucau Vila, Munisípiu Baucau.
Lansamentu projetu ne’e prezide direita husi Ministra Edukasaun, akompaña husi Prezidente Autoridade Munisípal Baucau, ho apoiu husi parseiru dezenvolvimentu KOICA no implementasaun husi UNICEF.
Afonso hateten katak projetu ne’e hamutuk unidade 29, ho unidade 14 sei implementa iha Munisípiu Bobonaro no unidade 15 iha Munisípiu Baucau, iha ne’ebé ba Munisípiu Baucau, tuir planu implementa uluk unidade hitu (7).
“Iha Baucau ita nia parseiru sira hanesan KOICA ho UNICEF mak implementa. Maibé iha hitu mak uluk, sira seluk ne’e depois. Hitu ne’e lima prosesu aprovizionamentu la’o hotu ona, falta rua mak seidauk. Segunda mai ami enkontru sira atu halo site visit, implementa ona,” hateten Afonso dos Santos da Costa ba STL iha nia knaar fatin Vila Nova Baucau, Tersa nee (08/09/2026).
Nia esplika katak unidade hitu ne’ebé sei implementa uluk iha Postu Administrativu Laga, Matebian, Venilale no Vemasse. Enkuantu ba postu administrativu sira seluk sei hein faze implementasaun tuir mai.
Afonso hateten katak Servisu Munisípal Edukasaun Baucau la determina diretamente kona-ba unidade ne’ebé tenke konstrui uluk, tanba desizaun ne’e depende ba parseiru implementadór projetu.
“Dala ruma sira konstrui uluk hitu ba fatin sira ne’e tanba sira identifika karik preziza liu, tanba alunu sufisiente bele halo fatin di’ak ida ba sira. Ita nia parseiru sira mak halo levantamentu dadus, haree fatin ne’ebé presiza, depois sira tau iha ne’ebá,” hateten Afonso.
Nia hateten katak projetu konstrusaun edifísiu edukasaun infánsia ne’e importante atu aumenta asesu ba edukasaun pré-eskolar, liuliu ba labarik idade 3 to’o 5 ne’ebé iha Munisípiu Baucau, seidauk asesu sufisiente ba edukasaun pré-eskolar.
Tuir nia, konstrusaun edifísiu sira ne’e sei fasilita labarik idade ki’ik atu hetan oportunidade aprende no prepara an molok tama ba ensinu baziku, liuliu primeiru siklu.
Nia garante katak, ho edifísiu edukasaun infánsia ne’ebé sei konstrui, sei fasilita komunidade lori sira nia oan idade 3 to’o 5 hodi partisipa iha prosesu aprendizajen inisiu.
“Ida ne’e bele fasilita ona ita, tanba ne’e husu inan-aman atu kolabora. Programa infánsia ne’e nia objetivu atu dada oan sira antes tama ba primeiru anu,” Afonso rekomenda.
To’o notísia ne’e públika, STL seidauk hetan konfirmasaun husi parte UNICEF no KOICA.
(tom)
