DILI, STLTIMORLESTE.com – Servisu Edukasaun Munisipiu Bobonaro hatama ona relatóriu kona-ba bolsa kandidatu profesores neebe muda fatin laiha konhesimentu ba Ministériu Edukasaun (ME).
Haktuir Miguel Freitas nuudar Diretor Servisu Edukasaun Munisípiu Bobonaro ba STL liu husi telefone, Kinta nee (02/04/2026).
“Kona-ba ita nian bolsa kandidatu profesores neebe mak durante nee hanorin iha ita nian eskola nivel ensinu baziku iha Bobonaro, ikus sira muda fali ba fatin seluk, la fo konhesimentu ba ami, tanba nee ami hatoo ona relatóriu ba parte ME nasional, ami hatama iha fulan Marsu nian laran,” nia informa.
Miguel esplika, iha relatóriu laran nee hakerek deit katak, tuir kolokasaun husi Ministériu Edukasaun mai duni iha Munisípiu Bobonaro, maibe sira fila ou muda fatin nee sira la hatene tuir, nee mak lista nee hatama ona ba ME.
“Kona-ba resposta nee husi ME nasional seidauk, iha nain 13, maibe nain 2 hau konfirma fali, no nain 11 mak hau haruka ona lista ba ME, profesores sira nee maioria mak hanorin iha area remotas no sira nain 11 nee koloka mai iha bolsa kandidatu I, II no bolsa kandidatu III,” nia dehan.
(jac)
