DILI, STLTIMORLESTE.com – Servisu Edukasaun Munisipiu Dili seidauk halo aproximasaun ho okupantes sira neebe hela iha areador eskola 17 iha Munisipiu Dili.
Haktuir Diretor Servisu Edukasaun Munisípiu Dili, Sabino Pereira hatete, eskola 17 nee ida neebe, tanba ladun lembra didiak, tamba eskola 6 mak hasai ona okupantes sira nee lori ba sira nia hela fatin, eskola 6 nee mak eskola 10 Dezembru, Bidau Akadiru-hun, EBC Sergio Viera de Melo, EBC Hera, EBF Bemori, EBC Esperansa da Patria.
“Dadus hahu husi inisiu nee hau sempre koalia, eskola neebe okupantes sira hela nee iha 23, inklui areador SEM Dili hamutuk 24, ita konsege lori ona okupantes sira nee fila ba sira nian hela fatin, sei falta eskola 17 nee ita nafatin halo kordenasaun ho diresaun relevantes sira,” afirma Sabino ba STL iha edifisiu MNEK Dili, Segunda nee (04/05/2026).
Nia dehan, atu lori okupantes sira nee ba sira nian hela fatin, ho nunee bele fo espasu ba iha areador eskola ninia, hodi konstrui sala refetoriu, halo dapur ba merenda eskolar no atividades seluk.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes dehan, relasiona ho okupantes sira neebe mak too agora hela iha areador eskola, husi Diresaun Ensinu Sekundariu iha ME fo kompetensia ba Servisu Edukasaun Munisípiu Dili no SEATOU hodi haree asuntu nee.
“Hau hanoin kona-ba ita nian okupantes sira iha areador eskola nee, nee kompetensia Edukasaun Munisipiu Dili, sira mak iha kompetensia, ami nian linha koordenasaun neebe mak diak ho sira, ami nafatin fo kompetensia sira atu bele haree asuntu ida nee,” dehan nia.
Benjamin akresenta, nee duni kon-ba asuntu ida nee fo kompetensia ba Direitor Servisu Edukasaun Munisípiu Dili nomos parte SEATOU ninia, tanba eskola sekundariu balun iha Dili, komunidade sira sei hela iha areador eskola nian.
“Ita nafatin husu parte neebe ohin mensiona, nee sira mak iha kompetensia hodi haree ba komunidade neebe hela iha areador eskola nian, maibe ita nian eskola balun komunidade hahu hamuk ona fatin,” dehan nia.
Nunee mos Diretor Eskola Sekundáriu Jeral nu. 4 Setembru Balide, Sergio A. da Cruz,hatete, Eskola Sekundáriu Jeral nu. 4 Setembru Balide husu urjente ba Ministeriu Edukasaun (ME) atu bele rezolve okupantes iha areador eskola refere.
“Difikuldade neebe mak daudaun nee ami enfrenta mak hanesan ita nian komunidade hela iha eskola laran, sira seidauk sai, sira nia oan lao ba mai iha sala aprendizajen ninia oin no ami nian profesores sufisiente hela. Husu ba parte kompetensia atu rezolve ho emerjensia ligadun ho esforsu neebe hadia, maibe komunidade sira nia oan ba esraga hotu, fiar katak sei rezolve iha futuru,” tenik nia.
Sergio hatutan, bainhira komunidade sira hela iha resintu eskola nian,dala ruma ensinu aprendizajen lao hela, maibe komunidade sira halo movimentu tama no sai iha areador eskola nian.
(jac)
