BAUCAU, STLTIMORLESTE.com – Ministériu Edukasaun fó pose ba koordenadór pre-eskolar públiku na’in 13 iha Baucau, atu jere no koordena atividade edukasaun ba labarik sira.
Diretór Servisu Munisipál Edukasaun Baucau, Afonso dos Santos da Costa, hateten katak koordenadór sira ne’e sei hala’o knaar tuir responsabilidade no orientasaun husi Ministériu Edukasaun.
“Ida-ne’e ba pre-eskolar, ita hotu hatene iha Timor-Leste, sira nia mandatu to’o fulan neen de’it. Karik atu estende, ne’e depende ba desizaun Governu,” Afonso dos Santos da Costa hateten ba jornalista sira iha Katedrál Vila Antiga, Baucau, hafoin misa agradesimentu, Kuarta-feira (28/10/2026).
Nia informa katak, iha Munisípiu Baucau, eskola pre-eskolar privadu no públiku hamutuk 40. Husi total ne’e, eskola 28 hetan ona númeru emisaun, enkuantu koordenadór na’in 13 simu pose ba pre-eskolar públiku sira.
“Koordenadór na’in 13 ne’e foin simu pose ba eskola sira ne’ebé Estadu rekoñese ona,” nia afirma.
Iha serimónia ne’e, Padre Paróku Santo António, Vila Antiga, Baucau, Manuel da Silva Ximenes, SDB, hato’o mensajen iha misa agradesimentu, hodi husu ba Maromak atu fó matenek no sabedoria ba koordenadór sira, atu bele forma labarik sira sai jerasaun ne’ebé kontribui ba futuru nasaun nian.
Iha nia omelia, Padre Manuel bazeia ba lema “Halimar, Aprende, Deskobre no Susesu”, no esplika katak halimar tenke kria ambiente haksolok ba labarik sira, enkuantu koordenadór no estrutura eskola sira tenke servisu hamutuk atu deskobre kapasidade labarik ida-idak.
Nia mós apela ba inan-aman sira atu lori labarik ba eskola, tanba edukasaun importante ba dezenvolvimentu nasaun.
“Timor-Leste presiza ema matenek, maibé la’ós matenek iha kakutak de’it, maibé matenek ne’ebé tradús ba sabedoria,” nia enfatiza.
(tom)
