DILI, STLTIMORLESTE.com – Eis Diretora Rejionál Organizasaun Mundiál Saúde (OMS) ba Sudeste Aziátiku, louva progresu saúde Timor Leste (TL) nomos lideransa Prezidente Republika (PR), José Ramos-Horta.
Eis Diretora Rejionál Organizasaun Mundiál Saúde (OMS) ba Sudeste Aziátiku, Poonam Khetrapal Singh hato’o kestaun ne’e ba jornalista sira bainhira remata halo enkontru ho Prezidente Republika iha Palásiu Prezidensiál Nicolau Lobato, Bairo Pite, Tersa (08/09/2026).
“Ha’u kontente tebes atu haree progresu agora. Kada vez ha’u mai iha ne’e, ha’u haree buat sira sai di’ak liután,” dehan Lia.
Nia hatete katak, dezenvolvimentu iha Dili, inklui aumentu edifísiu no otél sira, hatudu katak Timor-Leste kontinua buras no dezenvolve.
Lia mós kompara situasaun tabaku iha nia vizita uluk ho situasaun agora. Nia lembra katak bainhira mai Timor-Leste ba dala uluk iha tinan 2000, fuma tabaku hetan iha fatin barak, inklui iha transportasaun no otél. Maibe agora ne’e halo nia sai defensór ba ambiente laiha tabaku no hakarak atu haree mudansa iha área saúde públika.
Nia hato’o parabéns ba profisionál saúde, komunidade no ema hotu ne’ebé kontribui ba esforsu atu prevene no elimina moras sira.
“Ha’u hakarak fó parabéns ba imi hotu no ba ema sira iha ne’e tanba sira hakarak atu hasai moras sira-ne’e. Sira lakohi moras sira-ne’e iha ne’e,” nia dehan.
Hafoin sorumutu, Singh hato’o ninia agradesimentu kle’an tanba simu kondekorasaun sivíl aas liu husi Timor-Leste ne’ebé fó husi Xefe Estadu. Nia ko’alia ho hahi’i kona-ba Prezidente Ramos-Horta, hodi deskreve nia hanesan lider ida ne’ebé “esesionál teb-tebes” no demokrátiku tebes ne’ebé ninia lala’ok nakloke no di’ak halo ema hotu sente hakmatek no konfortavel.
Reflete kona-ba ninia vizita dala haat ba nasaun ne’e husi tinan 2013, Singh destaka transformasaun notável husi infraestrutura Timor-Leste nian no mós lala’ok saúde públika. Nia louva dedikasaun koletiva husi governu Timor-Leste no ninia povu, ne’ebé lori ba eliminasaun ho susesu ba ameasa boot sira saúde públika nian, inklui sarampu, rubela, malária, no trakoma.
Alende ne’e, nia nota redusaun drástika no louvável iha uza tabaku (fuma) iha fatin públiku, ne’ebé hatudu kontraste boot no pozitivu kompara ho ninia impresaun inisiál ba nasaun ne’e iha tinan sanulu resin liubá.
Singh mós elojia espíritu komunitáriu ne’ebé forte ne’ebé dudu inisiativa saúde lokál iha baze no mós ospitalidade laran-luak hato’o ba profisionál médiku internasionál sira, hodi nota katak doutór estranjeiru sira sente simu ho di’ak tebes iha nasaun ne’e. Sente orgullu tebes ho progresu kontínuu nasaun nian no povu Timor-Leste ne’ebé simu ho liman-rua nakloke, Dra. Singh reajirma parseria ne’ebé forte no kontinua entre OMS no Timor-Leste, hodi espresa ninia espetativa boot atu bele halo tan vizita iha futuru.
(eme)
