BAUKAU, STLTIMORLESTE.com – Ekipa Fundasaun Raan Amigo Kariedade (FURAK) neebe naran konhesidu Rio Soares, hahu konstrui ona uma ba idozu António Mira Belo ho nia oan feto iha Aldeia Wai-Tunau, Suku Uma Ana Iku, Postu Administrativu Venilale, Munisipiu Baukau, iha neebe bainhira udan iha tempu kalan sira nain rua (2) toba deit iha udan laran, tanba kondisaun uma aat.
Reprezenta ekipa FURAK Cejar Pires aprezenta, hafoin publikasaun notisia husi media Suara Timor Lorosa’e (STL) no Radio Televizaun Timor-Leste, Empreza Publiku (RTTL.EP) kona-ba kondisaun uma neebe pertense ba idozu António Mira Belo ho nia oan feto atual hela iha Wai- Tunau Uma Ana Iko, haree kondisaun grave, tanba nee ekipa FURAK ho naran konesidu Rio Soares junta forsa kompras material konstrusaun too kedas fatin no hahu kedas ona konstrusaun uma foun ba idozu António Mira Belo ho nia oan feto.
“Uma nee halo durante loron 4 medida 6X4, tuir ami nia forsa no kbiit servisu Sabado ami sei entrega uma nain hodi uza ho fasilidade kompletu,” Reprezenta ekipa FURAK Cejar Pires hateten ba jornalista sira iha fatin konstrusaun uma ba idoza António Mira Belo, Tersa (05/05/2026).
Nia informa, ekipa FURAK konstrui uma ba sidadaun neebe prezisa iha territoriu Nasional inklui ho uma pertense ba idozu António Mira Belo hamutuk 31 ho medida hanesan inklui kompleta ho fasilidade.
Nia sublina, apoiu neebe durante ekipa FURAK halo, laos apoiu husi Politika nain sira, maibe hetan apoiu masimu husi Timor oan sira neebe servisu iha rai liur.
“Apoiu ida nee la haree ba kor no rasa maibe saida mak haree komunidade neebe hetan terus ami sempre tun direita nesesidade bazika no sira neebe prezisa uma ami halo,” Cejar Pires komenta.
Iha fatin hanesan benefisiaria Felisberta Pereira Belo oan husi Idozu António Mira Belo espresa sentimentu agradese ba ekipa FURAK, tanba hahu ona halo konstrusaun uma ba sira.
“Hau kontente tanba horibainhira hau husu nee sasan mai hotu ona hau husu agradese ba nain sira mai hasai ami nia foto ema fo tiha ona material mai halo uma,” Felisberta Pereira Belo espresa.
Entretantu ekipa FURAK prezensa iha Aldeia Wai- Tunau, Suku Uma Ana Iku, Postu Administrativu Venilale iha loron 05 Maiu nee ho material konstrusaun hanesan rai henek, besi, kalen, odamatan, janela no seluk tan akompanha kedas ho badaen hahu ona servisu konstrusaun uma ba idozu no nia oan Felisberta Pereira Belo neebe hetan akompanha husi Autoridade Suku.
(alb)
