LAUTÉM, STLTIMORLESTE.com – Sistema dijitalizasaun ba kartaun eleitoral ho marka Semi-biometrika loke ona ba komunidade Munisipiu Lautém, tanba nee komunidade sira tenke ba halo tratamentu kartaun eletroniku ho diak.
Diretor STAE Munisipiu Lautém, Sergio Belmonte afirma, tratamentu ba kartaun eleitoral ho sistema biometrika daudaun iha Munisipiu Lautém loke ona ba publiku, tanba nee komunidade sira hotu iha Postu Administrativu, suku no aldeia sira, presiza mai trata kartaun eleitoral biometriku nian, atu troka kartaun anterior sira.
Komunidade neebe mai atualiza kartaun eleitoral ho sistema biometrika ho total 1914, STAE Munisipiu Lautém konsege rejistu foun husi ema nain 343, tanba nee sistema lao nafatin, mezmu la hanesan ho imprimisaun ida manual, tanba nee uza sistema internet, nunee presiza prosesu, maibe sempre fo atendimentu nafatin ba ema hotu.
“Ita haree katak prosesu no karakteristika husi eleitoral ho sistema biometrika prosesu lao nafatin, tanba nee fiar nafatin ba ita nia tekniku sira atu esforsu nafatin, hodi halo atendimentu diak ba komunidade husi Munisipiu Lautém tomak, atu bele muda hotu nia kartaun anterior sira, ba uza kartaun eleitoral biometrika,” dehan Diretor STAE Munisipiu Lautém, Sergio Belmonte ba STL iha nia knaar fatin, Lospalos, Segunda (06/01/2025).
Tanba tuir nia, prosesu halo tratamentu eleitoral biometrika iha Munisipiu Lautem, kada loron STAE presiza ema nain atus ida (100), minimu, maibe depende ba rede internet kuandu lao diak, aumenta tan, ba ema neebe hakarak tarata nia kartaun eleitoral foun ho sistema biometrika nian.
Nunee husu ba komunidade sira hotu katak, presiza troka kartaun eleitoral ho Semi-biometrika iha anterior nian, troka fali ba eleitoral foun sistema biometrika nian, nunee bele utiliza kartaun eletoral ho eletroniku.
Iha parte ketak, José da Costa Souza hanesan komunidade hatete, sistema trata kartaun eleitoral ho marka biometrika, prosesu kleur liu, la hanesan sistema Semi-biometrika neebe uluk sei uza manual, tanba sistema foun ida nee depende ba internet, kuandu lao ho diak mak foin emprime.
Prosesu halo kartaun eleitoral foun, tempu naruk, mezmu nunee, maibe ema nafatin ho entuziasmu atu mai halo, tanba sistema eletroniku ida nee bele fo importansia ba ema hotu, atu mai trata nia kartaun eleitoral ho sistema biometrika, nunee sistema eletroniku bele identifika ho diak.
Entretantu Estudante Universidade Nasional Timor Lorosa’e (UNTL) area Edukasaun, Noel das Neves afirma, sitema foun trata kartaun eleitoral foun ho marka biometrika, hotu-hotu mai trata iha munisipiu, nunee Munisipiu Lautém foin loke ba publiku, atu ema hotu mai trata nia kartaun eleitoral foun.
Tanba sistema mak orienta ema hotu, liu husi planu Governu nian katak sidadaun Timoroan hotu tenke troka kartaun eleitoral tuan ba foun, entaun ema barak mak mai hodi trata nia kartaun eleitoral foun.
(EST 1)
