DILI, STLTIMORLESTE.com – Embaixador Timor Leste (TL) ba Republika Indonezia (RI), Roberto Soares relata progresu servisu ba Prezidente Republika (PR), Jose Ramos Horta.
Bainhira remata hasoru malu, Embaixador Timor Leste ba Indonezia, Roberto Soares ba jornalista sira iha Palasiu Prezidensial Nicolau Lobato, Bairo Pite, Dili, Segunda (10/03/2025) hatete, ohin hasoru malu ho Prezidente Republika Jose Ramos Horta hodi hatoo progresu servisu ba Xefe Estadu.
Embaixador TL ba RI dehan, Prezidente Republika Indonezia (RI), Prabowo Subianto iha vontade boot hakarak atu haklean nafatin relasaun ho Timor Leste (TL).
“Ohin loron ita bele dehan katak, Governu foun iha Indonezia neebe prezide husi Sua Exelensia Prezidente Prabowo, ho vontade boot atu kontinua haklean nafatin relasaun Timor Leste ho Indonezia. Tanba nee mak ohin mai iha nee atu atualiza hela progresu ida nee, no simu instrusaun atu kontinua halao servisu didiak promove Timor Leste ninia interese iha Indonezia, nomos ho parseiru sira neebe iha Indonezia, hodi kontinua sira nia apoia adezaun Timor Leste nian ba ASEAN”, dehan Embaixador Roberto.
Nia hatutan, enkontru ho Xefe Estadu nee nia mos relata progresu servisu neebe durante nee halao iha Indonezia liga ho progresu bilateral entre Timor Leste ho Indonezia.
“Ohin mai hasoru malu ho Sua Exelensia Prezidente Republika, hodi atualiza hela kona-ba progresu bilateral entre Timor Leste ho Indonezia. Hanesan ita boot sira akompanha iha fulan neen liu ba, atan oan hau nomeia sai embaixador Timor Leste nian iha Jakarta”, dehan nia.
Nia haktuir tan katak, durante mandatu tenta halo ona buat lubuk ida, ho objetivu mak atu haklean relasaun entre nasaun rua nee.
Durante fulan neen nia laran tenta halo ona servisu lubuk ida, ho nia objetivu atu haklean nafatin relasaun diak entre Timor Leste ho Indonezia, liu-liu aposta ba edukasaun, defeza no seguransa, komersial no industria nomos investimentu.
Nia mos relata ba Prezidente Republika katak, Indonezia mos iha komitmentu boot atu apoiu Timor Leste nia adezaun ba ASEAN.
(eme)
