DILI, STLTIMORLESTE.com – Eskola Hotelaria no Turizmu Becora too agora seidauk simu konsesaun eskolar no seidauk simu informasaun ruma, bainhira mak atu simu osan ida nee.
Haktuir Diretor Eskola Hotelaria no urizmu Bekora, Charles F. Guterres ba STL iha nia knaar fatin, Kinta nee (14/05/2026).
“Too agora ami seidauk simu konsesaun eskolar, ate a data seidauk iha informasaun ruma husi Ministeriu relevante, maibe ami nian relatoriu submete tiha ona ba Ministériu Edukasaun, ba osan nee mak ami seidauk hatene, bainhira mak sai, tanba too agora ba asuntu nee rasik ami seidauk iha informasaun ruma,” dehan nia.
Nia hatutan, bainhira simu konsesaun ida nee sei responde tuir nesesidade eskola nian presiza, tanba osan ida nee kada estudantes ida dolar rua, maibe ate agora sira seidauk simu osan ida nee, total estudantes husi sira nian eskola hamutuk 400.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes antes nee dehan, Ministrriu Eduksaun (ME) atribui ona konsesaun eskolar ba ensinu sekundariu jeral públiku hamutuk 77, maibe husu eskola keta haluha halo fali relatóriu mai ME.
“Konsesaun eskolar nee agora daudaun atribui hotu ona ba ita nian eskola sira, nee duni atribui hotu ona ba iha Munisípiu, eskola privadu falta Taur Matan Ruak foin mak asina hodi halo transfer ba, maibe munisipiu hotu-hotu ninia prosesu lao, maibe balun agora foti hela ona osan konsesaun eskolar, ita atribui ona konsesaun ba ita nian eskola 77, nee ita nian eskola públiku, privadu nee hela deit mak eskola Taur Matan Ruak,” katak nia.
Benjamin hatutan, montante konsesaun nee rasik nia rasik ladun lembra didiak, maibe presiza husu ba iha xefi departamentu, konsesaun nee atribui iha semana ida nee nian laran, tanba nee konsesaun nee atribui ba iha Eskola Sekundáriu Publiku ida-idak, numeru eskola sekundariu 77 nee eskola públiku deit.
“Eskola privadu iha haat ou lima nunee, lima mos hela deit mak eskola ida Taur Matan Ruak nee foin asina, maibe sira seluk nee lao ona, nee duni husu ba eskola sira bele foti ona sira nian osan iha konta bankaria, ho nunee bele ezekuta, maibe keta haluha halo fali relatóriu konsesaun mai iha ministériu,” tenik nia.
Nia dehan, liu husi media ida nee atu fo hatene katak, agora nee relatóriu tenke aneksa ho print konta bankaria husi banku hanesan mak labele, nee duni relatóriu tinan nee kada eskola tenke print out konta bankaria aneksa atu nunee husi ME hatene katak, saldo iha nee ba hela hira.
(jac)
