Ermelindo Eleitu Ba Suku Tahubein

Ermelindo Eleitu Ba Suku Tahubein. (Foto: Espesial)

DILI, STLTIMORLESTE.com – Kandidatu Suku Ermelindo da Costa eleitu ba Suku Tahubein, neebe ho votus 300 résin.

Informa Xefi Suku Mahaquidan, Cristovão Chances katak, Suku Tahubein neebe transforma husi aldeia ba suku, horiseik halao eleisaun ba suku foun no aldeia 3, rezultadu lao ho susesu, no komunidade entuziasmu hodi partisipa.

“Eleisaun horiseik ba Suku Tahubein lao ho susesu, Tahubein iha kandidatu ba Xefe Suku lista unika, tanba nee eleitu. Enkuantu ba Xefe Aldeia ba Aldeia 3 nee iha kandidatu nain 2 kada aldeia, maibe iha primeiru ronde kandidatu idak-idak mak liu”, informa Xefe Suku Mahaquidan, Cristovão Chances iha Alas Wedauberek, Munisipiu Manufahi, ba STL liu husi telefone, Domingu nee (26/01/2025).

Nia dehan, iha eleisaun nee rasik komunidade entuziasmu loos hodi partisipa. Bazeia ba numeru eleitores neebe mak rekolha tuir dadus 500 resin, maibe iha eleisaun iha eleitores 300 resin no iha 100 resin mak partisipa, tanba situasaun balu la permite.

Nia espera, nuudar Lidersansa Suku Mahaquidan nafatin halao koordenasaun ho Suku foun Tahubein, karik presiza kompleta ka kolaborasaun iha situasan balu ka programa balu, nia prontu, no nafatin esperansa ba Tahubein.

“Iha hau nia mandatu ba daruak, konsege harii tan Suku Tahubein neebe transforma husi aldeia ba suku, maibe iha parte balu mos triste tanba fahe malu, maibe ida nee tanba lei mak garante”, katak Xefe Suku Mahaquidan.

Tuir nia, maske triste maibe nafatin orgulhua, tanba Tahubein hamriik nuudar suku sei la sai obstakulu ba Suku Mahaquidan.

“Hau dehan hau triste, tanba durante lidera Suku Mahaquidan iha Aldeia 5, maibe husi 5 née ida nakfila ona ba Suku. Hau bele dehan katak, Mahaquidan hamriik ho oan nain 5, maibe ohin loron hetan tan bei oan ida, tanba Aldeia Tahubein nakfila ona ba Suku, sente kontente”, tenik nia.

Entretantu tuir dadus neebe STL asesu, Suku Tahubein hamriik ho Aldeia 3 hanesan Uma Tali Boot, Bisuda Bibere no Weda.

Xefi suku eleitu Tahubein, Ermelindo da Costa, Xefe Aldeia Weda, Maria de Jesus. Delegadu Crispin Tito de Araújo, Delegada Anita Barreto.

Xefe Aldeia Bisuda Bibere, Baltazar Caldas. Delegadu, Aluzio G. dos Santos, Delegada Natercia Fernandes.

Xefe Aldeia Uma Tali Bot, Vidal da Costa. Delegadu Agustinho F. Martins, Delegada Vitória Ximenes.

(gui)

Share it :

Leave a Reply

Your email address will not be published. Required fields are marked *