DÍLI, STLTIMORLESTE.com – Xefe Delegasaun Festival Nasionál Desportu (FND) Munisípiu Ermera, Paulina do Rosário Lemos informa katak, preparasaun ba partisipasaun Ermera iha FND 2026 atinji ona 75%, ho modalidade 14 ne’ebé sei reprezenta munisípiu ne’e.
Paulina hateten katak, modalidade sira agora hala’o hela treinamentu, prepara farda no ekipamentu atu asegura atleta sira bele partisipa iha abertura FND, ne’ebé sei realiza iha 29 Novembru 2026.
“Preparasaun ba kada modalidade lao hela. Ami rejista modalidade 14 iha nivel nasionál atu partisipa iha FND 2026. Preparasaun agora atinji ona 75%, no ami sei kontinua hadi’a buat hotu atu bele partisipa iha eventu ne’e,” hateten Paulina do Rosário Lemos ba jornalista STL, iha Ministériu Juventude, Desportu, Arte no Kultura (MJDAC), Sesta-feira, 9 Novembru 2026.
Nia esplika katak, modalidade 14 ne’ebé Munisípiu Ermera sei partisipa inklui futsal mane no feto, futebol mane no feto, basketeból, badminton, xadrez, boxe, taekwondo no modalidade seluk, inklui desportu paralímpiku.
Konaba apoiu orsamentál, Paulina hateten katak MJDAC aloka US$5.000 ba Munisípiu Ermera hodi apoia preparasaun atleta sira, inklui sosa ekipamentu no halo fardamentu.
“Osan US$5.000 ne’e transfere ona ba konta bankária MJDAC iha Munisípiu Ermera, no ami konsege foti ona osan ne’e atu halo preparasaun, inklui fardamentu atleta sira ne’ebé agora halo hela iha Díli,” nia afirma.
Nia kontinua katak, além apoiu husi MJDAC, Confederação Desportu Timor-Leste mos sei fó apoiu US$10.000 ba munisípiu. Maibé, orsamentu ne’e seidauk hetan tanba presiza entrega proposta husi kada munisípiu.
Paulina hateten katak, proposta husi Munisípiu Ermera prepara hela no espera atu remata lalais, atu bele hetan alokasaun orsamentál ne’e. Osan sei uza ba deslokasaun atleta husi Ermera mai Díli, transporte, akomodasaun no nesesidade seluk durante FND 2026.
Iha parte seluk, nia temi katak kona-ba alojamentu delegasaun, komisaun organizadora no seksaun lojístika iha nivel nasionál seidauk fó informasaun ofisiál ba Munisípiu Ermera kona-ba fatin ne’ebé sei aloka ba sira.
“Até agora ami seidauk hetan informasaun husi parte lojístika nasionál kona-ba fatin alojamentu. Maibé, ami iha planu atu identifika Hotel Leo Case, iha Raikotu, nu’udar fatin ida ba delegasaun Ermera,” nia hatutan.
Paulina aumenta katak, delegasaun Munisípiu Ermera sei mai ho totál ema nain 200, kompostu husi atleta nain 170, treinador no ofisiál sira husi modalidade 14 ne’ebé sei reprezenta munisípiu ne’e.
Ho preparasaun ne’ebé lao hela, Munisípiu Ermera espera bele lori delegasaun kompleta atu partisipa iha Festival Nasionál Desportu 2026, ne’ebé sei hala’o iha Díli.
(leo)
