DILI, STLTIMORLESTE.com – Eskola Sekundáriu Jeral (ESJ) no Ensinu Baziku Central (EBC) hamutuk 20 iha Munisípiu Ainaro sei menus rekursu umanu.
Haktuir Diretor Servisu Edukasaun Munisípiu Ainaro, Patricio da Costa Magno ba STL liu husi telefone, Kinta nee (21/05/2026).
“Kona-ba rekursu umanu hanesan profesor, ita nian eskola balun sufisiente ona, maibe eskola ida rua nunee seidauk no ita koko atu rezolve bazeia ba quadro pesoal neebe mak agora iha hela nee. Hau hanoin iha Munisípiu Ainaro nee kuaze ita nian eskola 20 mak sei menus rekursu, ita presiza aumenta ida rua, ita nian ensinu sekundariu mos balun sei menus,”nia dehan.
Nia dehan, ensinu sekundariu nee koloka ona Bolsa Kandidatu maibe seidauk kompletu, liga ba siensia sosiais ninia nee presiza tan rekursu umanu, liu-liu liga ba siensia sosiais ninia, ensinu baziku nee iha 93, eskola cafe 94, pre eskolar 46.
“Nibel ensinu baziku no nibel sekundariu, ita nian nibel rua nee mak sei menus rekursu umanu, sekundariu nee liga ba iha siensia sosiais ninia, ensinu baziku nee ita sei menus rekursu ba lingua portuguêsa ninia,” katak nia.
Nia akresenta, nuudar Diretor Edukasaun Munisípiu Ainaro halo ona lista iha kada eskola neebe sei menus rekursu nee hatoo ona ba edukasaun, depois sei haree ba iha quadro pesoal neebe mak iha ona.
Entretantu Diretor Servisu Edukasaun Munisípiu Bobonaro, Miguel Freitas hatete, eskola balun iha Munisípiu Bobonaro sei menus profesores, maibe ho rekrutamentu neebe halao husi ME nee bele rezolve hodi koloka profesores ba eskola neebe sei menus profesores.
Nunee mos Diretor Eskola Sekundáriu Jeral 10 Dezembru Comoro, Manuel Verdial dehan, sira nian eskola sei menus profesores no ba oin presiza aumenta tan, tanba profesores balun atu tama ba idade reforma, nunee hirak neebe tama reforma nee ita presiza substitui hikas iha sira nian fatin.
“Ami nian eskola sei menus profesores no ba oin presiza aumenta tan profesores, tanba profesores balun atu tama ba idade reforma, nunee hirak neebe tama reforma nee ita presiza substitui hikas iha sira nian fatin,” nia dehan.
(jac)
