DILI, STLTIMORLESTE.com – Eskola Sekundariu Jeral (ESJ) nu 4 Setembru Balide, rezolve ona sala 8 neebe inundasaun bee nalihun iha laran, no daudaun nee estudante sira uza sala refere ba ensinu aprendizajen.
Haktuir Diretor Eskola Sekundariu Jeral nu 4 Setembru Balide, Sergio A. da Cruz ba STL iha nia knaar fatin Balide, Segunda nee (10/03/2025).
“Sala ida neebe mak baibain halao prosesu aprendizajen nee, iha momentu ita halo intervista nee kedas rezolve ona kona-ba aula hirak neebe mak foin daudaun inundasaun nee agora rezolvidu ona, ita nian estudantes sira mos uza hodi halao prosesu aprendizajen lao hanesan baibain. Tanba antes nee ita nian estudantes sira ba iha sala enkontru ninia, biblioteka, laboratoriu, maibe depois ida nee rezolve ona, ami nian estudantes sira tama fali ba iha turma laran,” nia afirma .
Sergio dehan, sala ida OSIS ninia nee labele rezolve, tanba bee matan iha duni sala nee, sala nee ho andar leten sala rua hamutuk sala 8 mak rezolvidu ona, ida sala andar nee tuir los diak hela, maibe tanba bee nalihun iha kraik nee atu hakat ba iha andar nee labele, nee duni ida nee kategoria la uza.
“Turma rua iha kraik atu liga ba iha andar nee rezolve ona, nee husi eskola mak rezolve sala 8 nee, hanesan dirijenti eskola iha nia jestaun oinsa mak bele konsidera komunidade sira nian servisu, hamoos, fase, entaun ami rezolve tiha ona sala 8 nee, ami nian estudantes sira uza halao prosesu aprendizajen, tanba antes nee sala 8 bee nalihun iha laran,” katak nia.
Nunee mos Rosario Maia da Costa Martins hanesan estudante segundu ano dehan, bainhira udan areador eskola nee bee nalihun too mai iha portaun eskola inklui estrada boot bee nakonu, no sala neebe mak antes nee bee nalihun agora laiha ona, no estudantes sira uza sala hirak nee ba aprendizajen.
(jac)
