DILI, STLTIMORLESTE.com – Kondisaun sala aprendizajen ualu (8) iha Eskola Sekundáriu Jeral (ESJ) nu. 4 Setembru Balide too agora seidauk reabilita.
“Ami nian sala aprendizajen ualu mak ba oin tenke halo reabilitasaun, tanba sala ualu nee sai hanesan fatin neebe mak risku inundasaun iha tempu udan, nunee ita presiza reabilita sala ualu neebe ohin hau mensiona, sala ualu nee, agora dadaun ita nian estudantes sira uza ba iha prosesu ensinu aprendizajen,” dehan Diretor Eskola Sekundáriu Jeral nu. 4 Setembru Balide, Sergio A. da Cruz ba STL iha nia knar fatin, Tersa nee (28/04/2026).
Nunee mos, Carlos Correia nuudar Diretor EBC Manleuana dehan, oras nee daudaun sala aprendizajen ba estudantes Ensinu Baziku Central (EBC) Manleuana sei limitadu, sala ba estudantes kada sala tenke tur sena malu, hodi partisipa iha aprendizajen.
“Kona-ba konstrusaun sala foun neen (6) nee too agora seidauk hahu, maske tenta kontaktu ona ita nia parte infraetrutura nasional no parte PAM, maibe sira la atende, tanba nee konstrusaun nee rasik seidauk hahu. Ami nian sala ba estudantes sira sei limitadu hela, tanba nee kada sala estudantes too 60 resin, sira tur sena malu deit, hodi partisipa iha prosesu aprendizajen ba estudantes sira,” dehan nia.
Carlos salienta, agora daudaun sala aprendizajen hamutuk 15, maibe sala nee seidauk sufisiente ba estudantes, tanba nee ba oin presiza aumenta sala de aula, tanba numeru estudantes kada tinan aumenta, ho nunee sala de aula tenke aumenta para estudantes sira bele utiliza ba iha ensinu aprendizajen iha eskola.
“Kada tinan ita nian numeru estudantes nee sempre aumenta, entaun ita presiza atu aumenta sala ba ita nian estudantes sira, tanba ita nian konstrusaun sala husi PAM no infraestrutura nasional, maibe sira seidauk atende,” nia esplika.
Entretantu, Superintendente Edukasaun Munisípiu Dili, Cesarina C. Guterres hatete, eskola balun presiza halo reabilitasaun no balun halo konstrusaun foun, ho nunee bele aumenta sala de aula ba estudantes sira, tanba eskola balun presiza aumenta sala aprendizajen ba estudantes sira, tanba eskola balun sei menus sala.
“Ita nian eskola balun presiza halo reabilitasaun no balun halo konstrusaun foun, nunee bele aumenta sala de aula ba estudantes sira, tanba eskola balun presiza aumenta sala aprendizajen ba estudantes sira, tanba eskola balun sei menus sala,” katak nia.
(jac)
