DILI, STLTIMORLESTE.com – Eskola hamutuk 80 iha Munisípiu Bobonaro presiza aumenta sala de aula, reabilita no halo konstruksaun foun.
Lia hirak nee hatoo husi Diretor Servisu Edukasaun Munisípiu Bobonaro, Miguel Freitas ba STL liu husi telefone, Sesta nee (01/05/2026).
“Ami foti ona dadus iha eskola hamutuk 80, husi numeru ida nee balun aumenta sala de aula, reabilita no balun mak tenke halo konstrusaun foun, maibe ami seidauk identifika hira mak atu tama reabilitasaun, aumenta sala no hira mak atu halo konstrusaun foun, tinan ida nee sei responde uluk 9, nee sei halo iha fulan Junhu tinan nee,” katak nia.
Tuir Miguel, dadus eskola 80 nee hahu husi nivel pre eskolar, ensinu baziku, sekundariu jeral no ensinu tekniku vokasional, dadus ida nee SEM Bobonaro identifika iha tinan 2025 no finaliza iha fulan Marsu tinan nee.
“Ami haree ita nian kondisaun eskola hirak nee, sala laran ou tembok nakfera, nee ami hatoo ba iha parte infraestrutura nasional atu halo konstrusaun, agora hirak neebe mak plafon aat, nee reabilitasaun deit,” nia afirma.
Iha parte seluk, Diretor Servisu Edukasaun Munisipiu Ainaro, Patricio da Costa Magno hatete, kona-ba ekipamentus pratika nian iha ensinu tekniku vokasional nee kompletu hela para estudantes sira bele halo pratika, depois de simu teoria husi profesores, sira bele halo pratika, liga ba infraestrutura eskola nian nee tekniku sira sukat ona, dadus iha hotu ona, hein planu orsamentu husi ME.
“Difikuldade neebe mak ita nian eskola sira iha Ainaro enfrenta nee mak problema infraestrutura eskola no rekursu, infraestrutura mos eskola balun deit, laos eskola hotu-hotu, tanba eskola balun mak seidauk diak, sala de aula ba ita nian estudantes sira seidauk sufisiente, inklui kondisaun eskola neebe presiza atu hadia, nee manorin edukasaun pre eskolar no sekundariu ida,” dehan Patricio.
(jac)
