DILI, STLTIMORLESTE.com – Eskola hotu laos iha biblioteka jeral, maibe iha mini biblioteka, nee maioria eskola sira iha hotu.
Kestaun nee hatoo husi Superintendente Edukasaun Munisípiu Dili, Cesarina C. Guterres ba STL iha nia knaar fatin Kuarta nee (13/05/2026).
“Ita nian eskola hotu hotu laos iha biblioteka jeral, maibe mini biblioteka ou kantu biblioteka iha sala de aula maioria eskola iha hotu, ida nee ita identifika liu husi monitoring ba ita nian eskola hirak neebe mak lokaliza iha Munisipiu Dili,” dehan nia.
Tuir nia katak, livru hirak neebe mak iha eskola ida-idak bele asegura iha biblioteka neebe mak iha ona, tanba eskola sira iha ona mini biblioteka hodi bele asegura diak ba livru neebe mak iha ona.
Nunee mos Diretor Nasional Ensinu Sekundariu iha ME, Benjamin Gomes da Cruz Fernandes hatete, eskola ida-idak iha biblioteka no livru neebe mak apoiu husi Ministériu Edukasaun durante nee, oinsa eskola sira bele asegura ho diak, ho nunee kada loron estudantes sira bele asesu ba livru sira nee.
“Hau hanoin ita nian eskola ida-idak iha biblioteka no livru neebe mak apoiu husi Ministériu Edukasaun durante nee, oinsa eskola sira bele asegura ho diak, nunee kada loron estudantes sira bele asesu ba livrus sira nee,” nia informa.
Benjamin hatutan, bainhira eskola neebe mak sei falta livru nee husu direjente eskola sira bele halo pedidu mai iha ME, atu nunee hatoo ba iha diresaun kurikulu ninia bele fo apoiu eskola sira, maibe husu ba eskola sira bele asegura diak iha biblioteka neebe mak iha ona.
Entretantu Diretor Eskola Sekundariu Jeral nu. 4 Setembru Balide, Sergio A. da Cruz dehan, sira nian livru asegura diak iha biblioteka, maske livru seidauk kompletu, balun menus, maibe kada loron estudantes sira asesu livru sira nee.
“Ami nian livru asegura diak iha biblioteka, maske livru seidauk kompletu, balun menus, maibe kada loron ami nian estudantes sira asesu livrus sira nee,” tenik nia.
(eme)
