DILI, STLTIMORLESTE.com – Eskola Nicolau Lobato liu husi regulamentu interna bandu estudante sira lori telefone ba eskola, ho hanoin atu hanorin estudante sira fokus deit bá eskola.
Diretor Jeral Eskola Nicolao Lobato, Rui Lopes dehan, iha regulamentu interna eskola nian bandu estudante sira hotu labele lori telfone bá eskola, tanba eskola nia hakarak estudante sira hanoin los deit bá eskola.
“Bandu sira labele lori telefone bá eskola, tanba ita nia hakarak nee sira fokus bá eskola deit. Labele bainhira Profesor sira hanorin no esplika iha oin, estudante sira iha kotuk halo fali tik tok ka halimar facebook, tanba nee mak profesor sira bandu labele lori telefone mai eskola,” dehan nia STL iha Tasi-Tolu, Sesta (10/4/2026).
Nia katak, iha Eskola Nicolao laiha materia online neebe tenke lori telefone bá eskola, so uza bainhira iha TPC mak uza telefone, maibe bá halo iha uma, iha eskola bandu labele uza telefone. Bainhira lori telefone, eskola sita no bolu inan aman mai eskola mak entrega bá inan aman sira.
Nia katak, ho regra neebe iha too oras nee seidauk haree estudante husi eskola nee uza sala media sosial iha publiku. Uza media sosial neebe los, hanesan estudante atu aprende lisaun sira.
“Hanesan buat neebe ita la hatene bele asesu husi media sosial, laos uza media sosial nee ba fali buat seluk. Nunee mos bá profesor sira la komprende buat balun karik bele akompana iha media sosial sira, maibe la signifika katak uza media sosial nee hodi halo fali buat neebe ita hotu la gosta,” dehan nia.
Nia hatutan, media sosial nee uza tuir nia dalan. Husi eskola nomos profesor sira sempre fo hatene bá estudante sira bainhira iha liur ka fatin neebe deit uza media sosial karik tenke uza ho tempu, labele gasta tempu estuda nian hodi uza bá tik tok no buat neebe la fo vantajen bá iha futuru. Liafuan sira nee sempre fo hanoin bá estudante sira.
(dom)
