DILI, STLTIMORLESTE.com – Eskola Baziku Central (EBC) Manleuana ezekusaun konsesaun eskolar finaliza ona, no daudaun nee prepara relatóriu atu submete ba iha Ministériu Eduksaun (ME).
Diretor Eskola EBC Manleuana, Carlos Correia dehan, konsesaun eskolar neebe sira ezekuta hotu ona nee, nee primeiru periodu ninia, tanba nee agora daudaun sira prepara ona relatóriu hodi bele submete ba iha Ministériu eduksaun (ME), tanba konsesaun refere ninia ezekusaun finaliza ona.
“Kona-ba ami nian konsesaun eskolar nee ami ezekuta hotu ona, maibe husi parte inspesaun nian mak seidauk mai haree ami nian sasan, ami ezekuta tuir nesesidade eskola nian, hanesan ATK, meza profesores sira nian, armari, ATK nee mak hanesan livru, lapis, lapijeira, buat sira nee hotu mak tama iha ATK nee, nee duni konsesaun nee ami ezekuta remata tiha ona, no agora daudaun ami prepara hela relatóriu atu submete ba ME,” dehan Carlos ba STL iha nia knaar fatin, Kinta nee (07/05/2026).
Carlos dehan, relatóriu konsesaun sira sei hatama iha loron 15 fulan nee, tanba daudaun nee sei hein hela filial sira, konsesaun eskolar nee kada estudantes ida hetan dolar rua, tanba nee depende ba numeru estudantes neebe mak husi eskola nee iha.
“Ita sei hein fali relatóriu husi ita nian eskola filial sira, tanba nee bainhira sira haruka mai ami iha sentru nee, ami bele submete ona ba iha ME,” nia dehan.
Nunee mos Koordenador EBF nu. 5 Komoro, Marcelino Moniz dehan, konsesaun eskolar nee ezekuta tuir duni nesesidade husi eskola ninia, tanba osan ida nee depende numeru estudantes sira, tanba kada estudantes ida dolar rua, tanba nee bainhira eskola ezekuta hotu ona osan ida nee presiza halo fali relatóriu ba Ministériu Eduksaun.
“Konsesaun eskolar nee ezekuta tuir duni ita nian nesesidade husi eskola ninia, tanba osan ida nee depende numeru estudantes sira, tanba kada estudantes ida dolar rua, tanba nee bainhira eskola ezekuta hotu ona osan ida nee presiza halo fali relatóriu ba Ministériu Edukasaun,” nia esplika.
(jac)
