DILI, STLTIMORLESTE.com – Peskizadora Lao Hamutuk ho Profesores husi Eskola Teknika Vokasional Agrikola Natarbora relata preokupasaun konaba kondisaun eskola neebe aat ba Prezidente Republika, Jose Ramos Horta.
Bainhira remata hasoru malu, reprezentante Profesor ETANB Florindo da Costa Magalhaes ba jornalista sira iha Palasiu Prezidensial Nicolau Lobato, Bairo Pite, Sesta (07/08/2026) hatete, ohin hamutuk ho Peskizadora Lao Hamutuk mai relata kondisaun eskola neebe aat ba Prezidente Republika, Jose Ramos Horta.
“Ohin ami mai ho Lao Hamutuk fasilita ami bele mai hasoru nain Prezidente hodi hatoo ami nia situasaun real iha eskola Teknika Agrikula Natarbora nia neebe mak ami hatoo ba sua exelensia Prezidente Republika konaba konaba ami nia fasilidade aprendizajen iha Natarbora bele dehan katak grave, nia kondisaun grave tebes liu liu ba dormitoriu, biblioteka, ho kondisaun neebe mak aat los ona tanba nee mai hatoo ba PR,” dehan Professor husi Eskola Teknika Agrikula Natarbora.
Iha biban nee sira mos konvida Prezidente Republika atu vizita eskola refere hodi haree direita kondisaun eskola refere, nunee bele sai mos mensajen nasional katak eskola nee sai mos hanesan futuru pais ida nee.
Nia hatete, preokupasaun nee lideransa eskola nia, hatoo bebeik ona ba Governu liu husi Ministeriu edukasaun maibe too agora seidauk tau atensaun tanba nee sira mai hatoo direita ba Prezidente Republika.
“Ami hatoo beibeik, maibe resposta dehan planu hela, antes nee dehan hadia iha 2025 katak iha 2025 ba halo ona estudu viablidade no foti ona estudu sampel rai nia maibe too agora laiha implementasaun,” katak nia.
Nia hatutan, eskola nia kondisaun aat nee tinan 10 ona maibe seidauk iha ukun nain ida hodi tau atensaun ba eskola refere.
Estudante neebe halao estudu iha eskola Teknika Agrikula Vokasional Natarbora ho total 143 pesoas, no profesores sira total 30 i tal.
Iha biban nee Prezidente Republika Jose Ramos Horta hatete konaba lamentasaun hotu neebe reprezente professor husi eskola Teknika Agrikula Natarbora hatoo, Prezidente Republika sei hatoo ba Governu liu husi Primeiru Ministru Kay Rala Xanana Gusmao bainhira halo enkontru semanal.
Prezidente Republika hatete, nia sei buka tempu hodi ba haree direita eskola refere nia kondisaun nunee bele hatoo ba Governu liu husi Ministeriu neebe tutela hodi tau atensaun.
Nunee mos Koordenadora no Peskizadora Lao Hamutuk, Marta da Silva hatutan, sira mai hamutuk ho Profesor nain rua husi eskola Teknika Vokasional Agrikola Natarbora hodi relata preokupasaun neebe eskola hasoru ba Xefe Estadu.
“Ohin loron ami mai hasoru Prezidente Republika hodi fahe ami nia rejutadu peskiza neebe ami halo iha treinu oinsa haree ba asaun estratejia neebe balun bele hakat liu. Ohin ami lori mos mestri nain rua haree mos dezafiu balun neebe eskola tekniku agrikula iha Natarbora nee, atu haree katak oinsa mak eleva setor ida nee atu bele responde ba demanda nesesidade sira inklui mos ami haree katak agora dadaun ita haree mos soberania aihan nomos setor agrikultura neebe sai preokupasaun estadu oinsa ita bele ultrapasa oinsa ita bele redus importasaun ba aihan sira,” dehan Peskizadora Lao Hamutuk.
Nia hatete, sira haree importante ida mak urjensia mos diversifikasaun ekonomia dala barak ema mai ho konseptu diversifikasaun ekonomia maibe oinsa diversifikasaun ekonomia neebe bele implementa no hamenus mos dezempregu setor agrikultura inklui kontribui ba ekonomia rai laran.
Assuntu sira nee importante tebes atu deskute ho Prezidente Republika, satan agora tama iha kolaborasaun 2027 nia tanba nee tempu nee diak los hodi hatoo preokupasaun hotu ho Prezidente Republika.
(eme)
