AINARO, STLTIMORLESTE.com — Estrada aldeia no ligasaun Ainaro-Bobonaro neebe seidauk diak prejudika tebes movimentasaun komunidade nian iha Suku Mau-Ulo, Postu Administrativu Ainaro, Munisipiu Ainaro, tanba hamosu impedimentu boot ba sirkulasaun transporte, no kondisaun ligasaun estratejiku husi Ainaro ba Mau-Ulo too Bobonaro aat tebes.
Pior liu tan, estrada boot neebe liga Munisípiu Ainaro ba Bobonaro neebe kaer husi Kompanhia WTJ dezde tinan 2017 too agora seidauk finaliza ho kualidade neebe diak, hodi hamosu risku boot bainhira akontese inundasaun no rai-halai.
Xefe Suku Mau-Ulo, Luís Valadares Colaço, hateten katak infraestrutura viaria neebe mehi husi komunidade too ohin loron seidauk sai realidade, tanba projetu neebe lao kleur ona nee la fo impaktu pozitivu ba sirkulasaun loron-loron nian.
“Estrada husi aldeia liga ba aldeia iha ami nia suku seidauk diak. Estrada husi Ainaro – Mau-Ulo ba Bobonaro nee konstrui husi kompanhia WTJ iha tinan 2017, maibe too agora seidauk diak. Bainhira akontese inundasaun ka rai-halai, fo risku boot ba kareta no transporte sira atu ultrapasa ba-mai,” hatoo Xefe Suku Luís Valadares Colaço ba STL, iha Ainaro, Tersa nee (18/08/2026).
Kondisaun nee fo impaktu ba atividade ekonomika, transporte publiku, no movimentasaun ba area edukasaun ho saude tanba pasajeiru no motorista sira tenke hakat ho kuidadu boot no dalaruma tenke para atu hein too bee maran ka situasaun sai diak fali.
Líder komunitariu nee husu ba Ministeriu Obras Publikas (MOP) atu tau atensaun seria ba problema nee no halo bolu (chamada) ba kompanhia WTJ hodi aselera no finaliza konstrusaun estrada nee ho kualidade neebe diak.
Iha fatin ketak, Observadór Ekonomia, Samuel de Jesus, sublina katak atrazu ba konstrusaun estrada nee bele hamate ekonomia lokal tanba hamenus sirkulasaun bens no servisu sira.
“Ita nia Governu tenke foti desizaun urjente hodi solusiona problema nee, tanba se labele, kondisaun nee sei fó ameasa seriu ba futuru ekonomia no ba moris komunidade nian iha rai laran,” dehan Samuel de Jesus.
Nia hatutan katak, sirkulasaun merkadoria neebe la lao ho diak bele halo folin sasan sae iha merkadu lokal, no hamenus rendimentu agrikultor sira nian neebe depende deit ba transporte terrestre atu faan sira nia produtu agríkola.
Entretantu, Akademista husi Universidade Paz (UNPAZ), José Ramos Soares, husu ba Governu atu halo auditoria no supervisaun rigurozu ba projetu infraestrutura sira neebe paradu kleur ona. Nia dehan katak transparensia no akontabilidade husi kompanhia sai xave fundamental hodi garante katak, osan publiku uza ho loos ba benefísiu komunidade nian.
(car)
