Estrada Diresaun Baukau-Dili, Iha Lulihene Bukoli Ameasadu Kotu

Estrada Nasional diresaun Baukau-Dili iha Aldea Lulihene, Suku Bukoli, Postu Administrativu Baukau Vila, Munisipiu Baukau, ameasadu kotu. (Foto: Espesial)

BAUKAU, STLTIMORLESTE.com – Estrada Nasional diresaun Baukau-Dili iha Aldea Lulihene, Suku Bukoli, Postu Administrativu Baukau Vila, Munisipiu Baukau, ameasadu kotu, tanba impaktu husi udan boot neebe akontese semana kotuk foin lalais nee.

Diretor Servisu Obras Publiku Munisipiu Baukau, Agostinho Ximenes esplika, estrada antes nee reabilita husi kompanhia internasional, maibe hafoin remara iha tinan 2023 konsege monu uluk, tanba impaktu husi udan.

Nunee Governu liu husi Ministeriu Obras Publiku kontratu kompanhia Sinar Satelite Unipessoal. Lda halo hikas reabilitasaun, maibe iha fulan Fevereiru tinan nee, estrada refere kontinua monu, tanba kauza husi udan boot neebe akontese foin lalais nee.

“Ami ba foti ona dadus, ita haree situasaun nee perigu la halimar, transporte sira bele utrapasa, maibe labele ansi, bainhira ba mak kuandu sidi bele monu,” hatete Diretor Servisu Obras Publiku Munisipiu, Baukau Agostinho Ximenes ba STL iha knaar fatin, Tersa (04/02/2025).

Agostinho sublina, bazeia ba kompetensia servisu, Servisu Obras Publiku Munisipal laiha kompetensia atu atende problema estrada nasional, maibe liu husi ekipa destakadu nasional iha Baukau halo ona levantamentu dadus tuir planu sei relata ba Ministeiru hodi responde ho urjente.

Tanba bainhira la responde sedu ba problema estrada refere, posibilidade sei kotu hodi difikulta ba movimentu transporte publiku no privadu diresaun Munisipiu Lautem, Vikeke no Baukau ba kapital Dili.

Maibe tuir levantamentu dadus iha terrenu nota katak, afeta ba uma kain ida neebe parede sira kuaze nakfera no bainhira la halo atuasaun urjente mak udan boot kontinua akontese, posibilidade uma refere bele afeta ba inundasaun, tanba distansia rai no estrada monu ba area uma nian hela deit metru 3.

Nunee ho reabilitasaun estrada diresaun Uaika Kelikai-Ossu Munisipiu Vikeke neebe daudaun lao hela responsabiliza husi Kompanhia Internasional no fatin balu fui ona asfaltu, maibe tuir publikasaun iha media sosial katak, asfaltu neebe parte kompanhia fui laiha kualidade, tanba hahu nakfera, maibe parte Obras Publiku Munisipal hamutuk ho ekipa nasional destakadu seidauk halo identifikasaun, maibe planu sei tun terrenu iha tempu besik hafoin relata ba publiku.

(EST 2)

Share it :

Leave a Reply

Your email address will not be published. Required fields are marked *