DILI, STLTIMORLESTE.com – Dezenvolvimentu infraestrutura estrada nuudar kompetente prinsipal neebe fo impaktu diretu ba asesu mobilidade, sosiu ekonomiku no dezenvolvimentu komunidade nian iha area rural sira. Tanba ligasaun neebe diak laos deit fasilita movimentu transporte, maibe mos sai nuudar naroman no xave importante tebes hodi lori progresu ba komunidade
Fasilidade estrada neebe kualidade foti sae ekonomia lokal liu husi lalaok transporte neebe lalais no seguru, liu-liu hodi tula produtu agrikultura nian husi foho ba merkadu sentral. Aleinde nee dezenvolvimentu nee mos fasilita komunidade sira hodi asesu lalais ba fasilidade baziku sira, hanesan sentru saude no estabelesimentu edukasaun.
Iha parte seluk, dezenvolvimentu estrada neebe kualidade lori benefisiu boot hodi hamenus kustu transporte no foti sae padraun moris komunidade nian iha baze. Infraestrutura nee kontinua sai foku prinsipal hodi dudu kresimentu ekonomiku neebe inkluzivu no sustentavel iha teritoriu laran tomak.
Konaba nee, Observador Ekonomia, Silveiro de Jesus fo hanoin katak dezenvolvimentu estrada neebe kualidade nuudar xave, hodi dudu kresimentu ekonomiku neebe lalais liu iha baze. Tuir nia, investimentu infraestrutura neebe forte no sustentavel sei hamenus kiak no loke dalan foun ba estabilidade ekonomiku povu nian, hodi lori mudansa neebe lojiku ba moris diak komunidade nian.
“Hau hanoin, Governu presiza duni fo prioridade ba kualidade konstrusaun eatrada nian, laos deit halo hodi kumpri deit projetu. Se estrada sira nee aat lalais no la dura, ida nee sei lori deit fali prejuizu boot ba Governu no halo povu iha baze kontinua terus no moris iha mukit latan,” dehan Silveiro ba STL iha Akait, Dili, Kuarta nee (15/07/2026).
Nia dehan, hodi garante kualidade neebe naruk, parte fiskalizasaun husi Governu mos tenke firme no labele fo toleransia ba kompanhia sira neebe halo servisu ho kualidade la diak. Tuir nia, estratejia nee sei lori impaktu pozitivu neebe lojiku hodi proteje osan Governu nian no asegura katak, dezenvolvimentu nee fo duni baze makaas ba moris diak povu nian iha tempu naruk.
Iha parte seluk Akademista UNPAZ, Saturninho Soares, mos fo nia analiza hodi hatoo katak dezenvolvimentu infraestrutura neebe la diak bele hamenus konfiansa povu nian ba Governasaun. Tuir nia, estrada neebe dura nuudar pilar hodi dudu kualidade moris, nunee planeamentu integradu no supervizaun neebe rigorozu mak sai xave hodi asegura katak, investimentu hotu loti duni benefisiu lojiku ba dezenvolvimentu nasional.
(car)
