DILI, STLTIMORLESTE.com — Tribunal Judisiál Primeira Instánsia Dili (TJPID) iha Segunda, 7 Setembru 2026, hala’o prosesu primeiru interrogatóriu ba arguidu nain neen (6), ne’ebé autoridade seguransa detein iha hotel ida iha área Praia dos Coqueiros, Dili.
Arguidu nain 6 lori mai iha tribunal, no Ministériu Públiku liuhusi Prokurador Rafael Gusmão, promove krime haat kontra sira, inklui jogu ilícitu, previstu iha Artigu 322 Kodigu Penal; asosaun kriminoza, previstu iha Artigu 188; brankeamentu kapitál, previstu iha Artigu 313; no burla informátika, previstu iha Artigu 268 Kodigu Penal Timor-Leste.
Iha sala audiénsia, Juíza turnu Jumiati Freitas halo identifikasaun ba arguidu sira, no husu parte MP atu tama ba faze alegasaun.
Iha alegasaun, Ministériu Públiku husu tribunal atu aplika medida koasaun haat ba arguidu nain neen, inklui mantein medida Termu Identidade no Rezidénsia (TIR) ne’ebé antes aplika ona, aprezentasaun periódika, koasaun no proibisaun ba ausénsia.
Enkuantu parte defeza, aseita pedidu Ministériu Públiku nian.
Hafoin rona alegasaun husi parte rua, tribunal deside mantein medida TIR ba arguidu nain neen, aplika medida proibisaun ba ausénsia no koasaun US$ 4.000 kada arguidu.
Tribunal mos fó prazu loron 10 ba arguidu sira atu depozita osan koasaun iha tribunal. Se liu prazu ne’e no sira la depozita koasaun, tribunal sei bele altera medida koasaun ba medida seluk tuir lei.
Prosesu ne’e prezide husi Juíza turnu Jumiati Freitas. Ministériu Públiku reprezenta husi Prokurador Rafael Gusmão, enkuantu arguidu nain neen hetan asisténsia jurídika husi advogadu privadu nain tolu.
(ter)
