BAUCAU, STLTIMORLESTE.com – Estudante husi Institutu Superior Cristal Polo Baukau, Fakuldade Siensia Saude, nain 56 jura ba biblia atu halao estajiu dahuluk iha Hospital Rejional Eduardo Ximenes (HoREX) Baucau.
Dekana Fakuldade Siensia ba Saude iha ISC, Fabíola Francisca Martins Soares aprezenta, atividade camping day mak kultura ida husi ISC bainhira estudante sira antes atu halao estajiu iha terrenu, dahuluk ho misa iha neebe estudante estajiadu no estajiada sira halo juramentu ho biblia iha altar santo hodi kompromete halao estajiu tuir etika siensia saude nian.
“Estudante neebe ohin loron juramentu profisaun nee husi Fakuldade Siensia de Saude kompostu husi departementu emfremajen no parteira semestre tolu,” hateten Dekana Fakuldade Siensia ba Saude iha ISC, Fabíola Francisca Martins Soares hafoin remata misa agradesimentu neebe realiza iha Igreja Paroquia Santo António Vila Antiga Baucau prezide husi Padre Adérito Victor Soares SDB, Sabado (16/05/2026).
Nia informa, estudante semestre tolu husi Fakuldade Siensia ba Saude neebe halao juramentu profisaun husi departementu emfremajen nain 38 no departamenti parteira nain 18 neebe sei halao estajiu durante fulan rua iha Hospital Rejional Eduardo Ximenes (HoREX) Baucau.
Nia sublina, estajiu ba estudante nain 56 refere nuudar pasu dahuluk ba sira, nunee durante estajiu iha HoREX Baucau sei foku deit ba profisaun baziku nian no espera estudante hirak nee sei halao estajiu diak durante fulan rua iha HoREX.
“Esperansa katak estudante sira nee antes atu tun ba estajiu sira halo ona preparasaun masimu iha sira nia instituisaun rasik no sira bele ganha esperensia iha fatin estajiu tuir sira nia area espesializasaun ida idak,” Fabíola akresenta.
Iha fatin hanesan Padre selebrante Aderito Victor Soares SDB enkoraja estudante estajiadu nain 56 refere atu halao estajiu ho diak iha fatin determinadu no atedimentu ba pasiente sira tuir orientasaun neebe instituisaun haruka.
“Komprimisiu nee hanesan hahu, aprende iha sala oituan, maibe pratika nee bainhira iha terrenu haforte imi nia laran luak ema neebe imi hasoru rezolve hamutuk ho mediku sira transforma moras ba ksolok ho domin,” katak Padre Aderito.
Padre nee sublina, knaar ba pesoal saude no pesoal mediku sira laos ho aimoruk sira deit, maibe tenke iha domin ba pasiente sira nunee pasiente bele sente haksolok ho tratamentu sira tuir kurativu husi Jesus Kristu ba nia emar sira ho domin. Tanba nee prezisa banati tuir Jesus Kristu nia domin iha ita nia knaar sira hodi nunee servisu sira lao ho diak.
Estudante estajiadu husi departementu emfremajen, Nelson Raul Ximenes konsidera, estajiu refere nuudar oportunidade ba sira iha neebe sei hetan konhesementu klean liu tan hodi kompleta esperensia sira neebe hetan ona iha laboratorium eskola nian.
“Estajiu ida nee ami estudante prontu ona, tanba durante fulan ida nia laran ami pratika, tanba nee ami sei kontribui iha HoREX tuir ami nia koinhesementu no abilidade neebe mak ami aprende ona durante estajiu nia laran,” Nelson komenta.
Entretantu estudante estajiadu nain 56 nee, halao juramentu iha alta santa Igreja Paroquia Santo António Vila Antiga Baucau, neebe testemunha husi Prezidente Ezekutivu Fundasaun ISC, Magnifiku Reitor ISC ho nia estrutura nasional no Polo Baucau inklui estudante nia inan aman.
(tom)
