BAUKAU, STLTIMORLESTE.com – Estudante finalista anu letivu 2024 nain 10, iha Eskola Sekundaria Jeral Publiku (ESJ) 01 Tirilolo, Baukau, hetan melhora klasifikadu, tanba prienxe valor husi Ministeriu Edukasaun.
Diretor eskola, Estevao Ximenes Gusmão esplika, kandidatu estudante finalista iha ESJ 01 Tirilolo ba anu letivu 2024 hamutuk 509, iha neebe nain 2 la konsege tuir ezame refere, tanba kestaun kondisaun, nunee partisipante finalista hamutuk 507, maibe remata ezame nasional estudante nain 1 fila ba Aman Maromak nia kadunan santu, nunee avansa ho nain 506 partisipa ezame nasional no lokal too hotu.
“Iha 506 mak tuir ezame too hotu. Parte CT neebe melhor mak iha valor 56 no CSH iha valor boot mak 52,” hatete Estêvão ba jornalista sira, hafoin distribui rezultadu ezame nasional ba estudante sira, iha ESJ 01 Tirilolo, Baukau, Segunda (16/12/2024).
Estudante finalista CT tuir Estêvão neebe hetan melhor klasifikadu mak hanesan Raimundo X. Aparicio, Laurentino P. Soares, Aida S. dos Santos, Helder X. V. Sarmento, Fidelio P. Fernandes no Sejuina Pinto. Enkuantu area CSH mak mak hanesan Angelita Soares, Maria A. G. Ximenes, Favio O. Gusmao inklui Juvelina M. de Jesus.
Estudante nain 10 nee prienxe kriteriu klasifikadu husi Ministeriu Edukasaun, tanba fo tarjetu ba area CSH tenke ho valor 52 no CT ho valor 54, maibe estudante hirak nee nain 3 husi area CT konsege prienxe ho valor 56, enkuantu restu mantein ho valor tarjetu husi ME.
Rezultadu ezame refere iha ESJ 01 Tirilolo estudante sira 100% pasa, maibe iha estudante liu nain 50 husi area estudu CT no nain 20 resin husi area CSH bele asesu Universidade Nasional Timor Lorosae (UNTL), tanba mezmu la prienxe kriteiru melhor klasifikadu, maibe liu ho valor mais 46 tuir kriteriu ME nian ba asesu UNTL nomos balun sei asesu area estudu medisina jeral iha UNTL, tanba liu ho valor 56.
Maibe durante prosesu aprendizajem ba anu letivu 2024 eskola refere hetan dezafius, tanba menus profesores, maibe ho esforsu tomak konsege fo rezultadu serteja ba estudante finalista sira neebe pasa ho 100% ori eskola ESJ 01 Tirilolo Baukau okupa desimu lugar reprezenta eskola sekundariu sira iha nivel nasional.
Husi rezultadu nee, Dirijente Eskola nee promete sei luta iha prosesu aprendizajen anu letivu 2025 nian atu redus okupa desimu lugar no sei produz estudante sira ho kualidade, nunee bele sai futuru neebe garante iha prosesu dezenvolvimentu.
Enkuantu melhor klasifikadu ho valor 56 finalista anu letivu 2024 husi ESJ 01 Tirilolo, Raimundo A. Aparicio agradese no orgulhu ho rezultadu refere, tanba bele hetan melhor klasifikadu ba anu letivu 2024 nian.
No rezultadu melhor klasifikadu ho valor 56, nia argumenta, bainhira hetan oportunidade iha UNTL sei kontinua estudu nunee bele sai rekursu umanu diak ba nasaun Timor Leste.
Entretantu ligadu asuntu nee, jornalista STL tenta konfirma Diretor Servisu Edukasaun Munisipiu Baukau, maibe laiha fatin atu fo komentariu, tanba sei tuir enkontru importante balun iha Nasional.
Tuir dadus estudante anu letivu 2024 iha Baukau neebe partisipa Ezame Nnasional no lokal hamutuk nain 5.542 neebe rejistu husi eskola baziku sentral 2.865, sekundaria jeral 2.473, Tekniku Vokasional hamutuk 204, husi eskola 68 kompostu Ensinu Baziku 41, Sekundariu jerJeral al 22 no Tekniku Vokasional 5.
(EST 2)
