BAUCAU, STLTIMORLESTE.com – Estudante na’in rua (2) benefisia ba manu tolun fuan ida iha Eskola Ensinu Baziku Filial (EBF) Uaitame, Munisípiu Baucau.
Reprezentante estudante EBF Uaitame, Denilson da Costa esplika, menu merenda eskolar organiza tuir loron eskola. Iha Segunda-feira, estudante sira hetan etu ho modo naan karau.
Iha Tersa-feira, menu mak iha etu ho modo tahan no modo manu-tolun. Enkuantu iha Kuarta-feira, estudante sira hetan etu ho modo tahan no modo koto-da’an.
Iha Kinta-feira, menu muda ba paun fuan ida no chá. Enkuantu iha Sesta-feira, estudante sira hetan etu ho modo tahan no tahu’u.
Denilson mós hateten katak, aleinde menu ne’ebé iha kada loron, hudi tasak fornese ba estudante sira kada loron. Tanba durante han, laiha ai-fuan seluk ne’ebé fornese iha programa merenda eskolar, maibé hudi tasak mak disponivel loro-loron.
Tuir nia, programa ne’e halo estudante sira sente kontente tanba sira hetan hahán iha eskola, liuliu etu ho kuantidade ne’ebé sufisiente.
“Sira fó ami etu barak, ami han to’o bosu, no ami sente kontente atu mai eskola,” Denilson da Costa konfesa ba STL iha EBF Uaitame, Tersa (15/09/2026).
Relasiona ho menu no implementasaun Programa Merenda Eskolar iha EBF Uaitame, STL tenta atu konfirma responsabilidade no mekanizmu implementasaun programa refere, inklui kona-ba menu no distribuisaun hahán ba estudante sira. Maibé seidauk iha parte responsavel ne’ebé disponivel atu fó komentáriu kona-ba situasaun ne’e, tanba laiha fatin.
Observasaun STL nian iha terenu, Tersa-feira nee nota, estudante sira simu duni etu bikan ida, hamutuk ho modo no manu-tolun da’an.
Maibé, iha distribuisaun manu-tolun, STL observa katak manu-tolun fuan ida fahe ba estudante na’in rua. Situasaun ne’e mós konfirma liuhusi deklarasaun estudante sira, ne’ebé hateten katak kada semana, iha loron Tersa-feira, estudante na’in rua sempre benefisia manu-tolun fuan ida.
Entertantu, EBF Uaitame rejista atualmente estudante hamutuk na’in 178, husi Primeiru Siklu to’o Terseiru Siklu.
(tom)
