DILI, STLTIMORLESTE.com – Tau matan no fo atensaun makaas bá oan sira nia estudu primeiru mak inan aman sira, tanba labarik sira nia tempu barak liu iha uma, enkuantu iha eskola sura oras deit.
Tuir Professor Eskola Colegio Sao José Operario, Silverio da Costa Rebelo dehan, bainhira estudante ida atu hetan prestasaun no komportamentu diak iha eskola ida, presiza kolaborasaun entre eskola nomos inan aman sira. Bainhira sira sai husi uma too eskola, nee responsabilidade tomak husi eskola, tanba iha eskola manorin nain sira mak sai fali inan aman bá labarik sira. Tanba nee eskola iha dever tau matan no kontrola komportamentu husi kada estudante sira iha lor-loron, bainhira fila ou sai husi areador eskola, nee responsabilidade tomak iha inan aman sira nia liman ona.
Tanba nee husu bá Inan aman sira atu tau matan, fo atensaun no kontrola oan sira bainhira iha uma, nunee sira bele hakas aan estuda materia neebe sira simu husi profesor kada disiplina nian.
“Hau hanoin estudante sira nia tempu hamutuk ho inan aman nee barak liu kompara ho profesor sira iha eskola, tanba iha eskola nee sura oras deit sira fila uma ona. Tanba nee kolaborasaun entre eskola ho inan aman sira nee importante tebes. Bainhira estudante balun iha problema, parte eskola sei halo karta samada bá inan aman sira, no momentu hanesan nee inan aman tenke kolabora mai eskola hodi hatene informasaun oan sira nian husi eskola,” dehan nia ba STL iha Balide, Segunda (04/05/2026).
Tuir nia, kolaborasaun husi inan aman ho eskola nee importante tebes, tanba bainhira parte rua hamutuk bele muda estudante neebe iha problema bele sai bá diak. Tanba nee mak bainhira parte eskola halo karta samada bá inan aman sira tenke koopera.
Nia hatutan, basa momentu nee importante tebes ba Inan aman sira atu kolabora ho eskola hodi mai hasoru profesor sira, atu nunee bele hatene tuir informasaun kona bá oan sira nia lalaok no atitude durante iha eskola, para nunee fila bá uma hodi kontinua fo atensaun no tau matan bá oan sira estudu.
Nia tenik, maibe dala ruma inan aman balun la kopera hodi hatan ba karta neebe iha, entaun sira la hatene tuir sira nia oan nia hahalok ka komportamentu durante iha eskola. Tanba komportamentu neebe ladiak husi estudante sira nia bele afeita bá sira nia valor iha izame periodu nian.
Nunee mos Professor Eskola Katólika Sao Pedro Felisberto Preto, liu husi fahe kaderneta hatete, estudante sira nia tempu ho inan aman mak barak liu, tanba nee bainhira eskola fo karta samada lori bá Inan aman tenke mai kolabora ho eskola, atu nunee fila bá uma hodi fo atensaun no tau matan bá sira estuda. Sewainhira Inan aman la kolabora ho eskola, impaktu bá oan sira nia valor no apontamentu de pontus husi eskola.
Nia afirma, atu evita para oan sira nia valor labele monu iha izame, inan aman sira tenke kolabora ho eskola hodi bele hatene tuir informasaun neebe mak sei fo husi eskola liu husi profesor da turma sira.
(dom)
