DILI, STLTIMORLESTE.com – Estudante husi Eskola Sekundariu Jeral nu 4 Setembru Balide hamutuk rihun 2 resin prepara aan ba iha ezame primeiru periodu, neebe sei halao iha fulan Abril nia laran.
“Kona-ba preparasaun seidauk, maibe sita hela ona data 12 nunee ami sei halo enkontru ho profesor sira, para nunee ita nian profesores sira bele prepara sira nian pontu ezame ba ita nian estudantes sira, depois mak eskola elabora. Kona-ba prezensa ita nian profesor sira iha turma ninia laiha problema, tanba lista prezensa mak sei kontrola ita nian profesores sira iha turma laran,” afirma Diretor ESJ nu 4 Setembru Balide, Sergio A. da Cruz ba STL iha nia knaar fatin Balide, Tersa nee (11/03/2025).
Nia dehan, nuudar Diretor Eskola hamutuk ho Adjuntu Diretor sempre observa, dala ruma adjuntu mos tama ba iha turma laran hodi haree unidade tematika sira neebe mak profesor sira hanorin nee avansa ou paradu, neebe kona-ba ida nee laiha problema, total estudantes hamutuk rihun 2 resin mak sei partisipa iha ezame primeiru periodu.
Entretantu Estudante Segundu Anu, Rosario Maia da Costa Martins hatete, nuudar estudante tenke ativu iha eskola, tanba iha tempu besik sei halao ezame primeiru periodu, ho ida nee loron-loron tenke partisipa iha aula.
“Nuudar estudante loron-loron ami tenke partisipa iha aula, tanba iha tempu besik ami sei halao ezame primeiru periodu,” nia afirma.
(jac)
