DILI, STLTIMORLESTE.com – Ministeriu Edukasaun (ME) liu husi Diretora Jeral Planu, Polítika, Inkluzaun no Informatíka hamutuk ho Autoridade Munísipiu Manatuto ho parseiru Child Fund halo distribuisaun oklu ba estudante sira neebe maka problema ho difikuldade visual iha Eskola Ensinu Baziku Sentral São Bento Salau, Posto Administrativo Soibada, Suku Leo-Hat, Aldeia Malus Hun, Munisípiu Manatutu, Tersa (14/04/2026).
Iha diskursu Diretora Jeral Planu, Polítika, Inkluzaun no Informátíka (DJ-PPII), Odilia das Dores Ung Martins hateten, importante tebes atu distribuisaun okulu ida nee mai estudante sira iha Eskola Salau, atu ajuda oan sira neebe maka hetan problema ho difikuldade visual.
“Parseiru sira prontu apoiu ida nee mak ita nian hakarak, tanba parseiru sira fo kontribusaun ba ita nian oan sira neebe maka hasoru ho problema difikuldade visual. Iha tempu sira hanesan nee ita hanoin katak politika ida nee atu responde ba problema sira neebe maka ita nian oan sira hasor,” dehan nia iha pajina media sosial ME neebe STL asesu Kuarta (15/04/2026).
Nia parte agradese ba parseiro sira husi Child Fund, neebe apoio ona ókulu hodi ajuda oan estudante sira, hodi kontinua sira nia aprendizajen loron-loron ho diak.
Iha sorin seluk Reprezentante Diretor Child fund, Antonio do Rosario hateten, Child fund serbisu ba programa barak neebe maka fóka liu ba labarik sira ho difisiensia.
“Ami mos agradese ba Ministeriu Edukasaun, liu husi departamentu edukasaun inkluzivu fo fiar mai Child fund atu halao programa iha nee, agradese mos ami bele apoio ona ókulu ba labarik sira atu partisipa iha sala laran liu-liu bele halo aprendizajen loron-loron nian,” dehan nia.
Atividade distribuisaun nee partisipa husi Diretora Jeral Planu, polítika, Inkluzaun no Informátíka (DJ-PPII), Odilia das Dores Ung Martins, Administradora Postu Administrativu Soibada, Teresinha da Costa Moniz, Diretur Edukasaun interinu Munisipiu Manatutu, Natalino M. Carvalho, no Reprezentante Diretor Child fund, Antonio do Rosario hamutuk ho Inan Aman no Estudante sira iha Munisípiu Manatuto.
(dom)
